Nos frater Johannes abbas Cistercii ceterique diffinitores Capituli generalis Ordinis Cisterciensis notum facimus quod in eodem generali Capitulo die XIII. mensis Septembris anno domini millesimo quadringentesimo nonagesimo quarto apud Cistercium celebrato facta fuit quaedam diffinitio cujus tenor sequitur et est talis. Cum abbates monasterii de Pelisio in Ungaria ut plerumque hactenus fuerunt, sicut et nunc modernus abbas est, commissarii Domini Reverendissimi D. Cisterciensis ac Capituli generalis habuerintque potestatem omnia et singula monasteria Ordinis in regno Ungariae visitanda, reformanda et per consequens ut ipsi intelligant Commissarii a nullo alio debuerint visitari, reformari in non parvum aliquorum monasteriorum detrimentum. Quare praesens generale Capitulum praecipit et mandat abbati monasterii de Sancta Cruce in Austria, ut monasterium de Pelisio iuxta formam et statuta Ordinis reformet, visitet, corrigat, emendet in capitibus et in membris tam in spiritualibus quam in temporalibus omnia et singula, quae secundum deum et regulam invenerit et cognoverit visitanda, corrigenda et emendanda. Ipsique abbati de Pelisio, quando .... petierit et requisiverit in suis commissionibus exequendis consilio, auxilio et favore assistendi et fideliter adjuvandi in plenaria Ordinis potestate. Datum in diffinitorio nostro Cistercii sub appensione sigilli diffinitorum ejusdem Capituli generalis, die, mense, anno et loco supradictis.

Source Fulltext: Zisterzienser-Chronik 12 (1900) S. 372