Alexander episcopus servus servorum dei. Dilecto filio abbati monasterii Sanctae Crucis prope Paden, Pataviensis diocesis salutem et apostolicam benedictionem. Conquestus est nobis Matheus Schosp, rector parochialis ecclesiae in Winpasen, Jauriensis diocesis, quod Johannes, plebanus ecclesiae in Tribuswinckl et quidam alii clerici et laici civitatis et diocesis Pataviensis super quibusdam domo, vineis, pratis, possessionibus et aliis immobilibus in eisdem civitate seu diocesi Pataviensi consistentibus mobilibus seu bonis, pecuniarum summis et rebus aliis ad eundem Matheum ratione successionis haereditariae quondam Margarethae ejus materterae seu amitae et alias legitime spectantibus injuriantur eidem. Ideoque discretioni tuae per apostolica scripta mandamus, quatenus vocatis, qui fuerint evocandi, et auditis hinc inde propositis, quod justum fuerit, appellatione remota usuris cessantibus decernas, faciens quod decreveris per Censuram ecclesiasticam firmiter observari. Testes autem, qui fuerint nominati, si se gratia, odio vel timore subtraxerint, censura simili, appellatione cessante compellas veritati testimonium perhibere. Datum Romae apud sanctum Petrum anno incarnationis domini millesimo quadringentesimo nonagesimo quinto, sexto die Januarii, pontificatus nostri anno quarto.

Source Fulltext: Zisterzienser-Chronik 12 (1900) S. 372-373