Frater Michael, abbas monasterii Sancte Crucis in Austria . . . universis et singulis venerabilibus et reverendis patribus, dominis abbatibus, abbatissis, prioribus, cellerariis, bursariis et officiariis dicti Ordinis per provinciam Austriae, Styriae, Carinthiae, Carniolae, Bavariae, Bohemiae et Morawiae ubilibet constitutis, ad quos prsesentes nostra; litterae praecipue pervenerint, salutem sinceramque in domino charitatem. Quanto Salvatoris domini nostri Jesu Christi adventus patribus in limbo sedentibus, quem longe saepe tractis suspiriis pro sui redemptione desideraverunt, et consolationi et gaudio fuerit majori: tanto nobis, reverendi patres, in hoc sacro plenitudinis tempore, quod saeculo finito advenit, affectus ad impetrandum jubilaeum debet esse flagrantior, quo peccata nostra delere, sordes et squalores animae diluere nec non conscientiam puram, omniumque criminum reddere immunem valeamus facillime; et quoniam certius nobis nihil morte, incertiusque hora mortis nihil: properandum celeriusque festinandum esse negotium aggredi videtur, ut quod hodie possumus, in crastinum non differamus; precamur ne longius exordiendo: benignas aures v. p. a proposito, quod praetendimus, suspendamus. Notum facimus per praesentes, nos pridie suscepisse commissionem, quam una transmittimus a reverendo domino nostro domino Cisterciensi, totoque Generali Capitulo de et super colligendo subsidio pro anno gratiae vel jubilaeo, a Romano moderno pontifice in totum sacrum Ordinem nostrum communicandum impetrando. Quae quidem commissio quemvis mature ipsam perlegentem clare instruit, quid quantumque ex taxa in ea posita dare et contribuere quisque debeat. Cujus itaque commissionis ad nos specialiter factae vigore, nos praefatus frater Michael abbas etc. omnibus vobis et cuilibet in speciali sub poenis et censuris in eadem contentis, districtius praecipiendo mandamus, quatenus eam summam sive quottam in dicta commissione nominatam, denique unicuique clare impositam, sine dilatione, praesentium nostro fideli nuntio, fratri videlicet Michaeli monacho et sacerdoti, nostrique monasterii originaliter professo, dare et exhibere libere velitis, vel infra quindecim dies ab exhibitione prasentium ad nos secure transmittere curetis. Et nihilominus non obstante praesenti subsidio pro dicto jubilaeo impetrando dando, ad alias contributiones ordinis nondum solutas, sub eisdem poenis, etiam nunc solvendas V. R. P. praesenti mandato astringimus. Insuper volumus praesentium latorem gaudere privilegio expensarum, quo solitum fuit et huiusque observatum, ne in via, dum nuntius sit, necessariis et rationabilibus careat expensis, secundum distantiam locorum; etiam si opus ei foret salvo conductu et petendo et habendo; honeste ipsum providere studeatis, cujus diligentiam, vestrarumque paternitatum voluntatis promptitudinem ad praemissa nobis litteraliter significantes. In quorum omnium et singulorum fidera, robur et testimonium evidentius sigillum nostrum abbatiale duximus appendendum. Datum ex monasterio nostro Sanctae Crucis anno domini millesimo, quingentesimo, die vero mensis Septembris primo.

Source Fulltext: Zisterzienser-Chronik 12 (1900) S. 184