Frater Jacobus, abbas Cistercii ... Venerabili et in Christo nobis praecharissimo abbati nostro monasterii de Sancta Cruce salutem et in commissis fidelem diligentiam adhibere. Cum propter multiplicia et varia Ordinis nostri agenda a sanctis patribus nostris in ipsorum agendorum prosperam directionem singulis monasteriis praefati nostri Ordinis pro eorum facultatibus annuae et generosae contributiones et nonnunquam caritativa subsidia impositae et imposita fuerint, nec hac nostra aetate minora quam priscis temporibus praefato Ordini occurrant agenda, prout experientia ipsa docet, tum propter R. domini nostri protectoris nec non procuratoris generalis Ordinis in curia annuorum stipendiorum solutionem, tum propter confirmationem generalem privilegiorum Ordinis a SS. domino nostro nuper obtentam, tum propter privilegiorum apostolicorum ad versus commendatarios||
et alios quoscumque ipsum Ordinem monasteriaque ipsius in quibuscunque regnis et provinciis infestantes virilem defensionem, propter quae Ordo ipse gravissima in diversis curiis regum et principum supportat onera; ob has causas Generale Capitulum nostrum novissime elapsum contributionem moderatam anno domini millesimo quadringentesimo octuagesimo nono impositam adhuc usque ad triennium imposuit et continuavit, ut dictis necessitatibus facilius occurrat. Cumque frustra esset, edicta facere ac astallationes et quottas contributionum et subsidiorum dictis monasteriis imponere, nisi essent, qui ea debitae executioni demandarent, et qui quottas ipsas monasteriis impositas levarent, et severitate censurarum, si necesse foret, exigerent, ut ex eis reipublicae facilius consulatur, et laborantes in vinea domini praemientur (?); hinc est, quod de vestra discretione, prudentia, zelo et fideli diligentia ad plenum confisi, vobis in virtute salutaris obedientiae committentes praecipimus, quatenus omnibus et singulis excusationibus cessantibus et postpositis vos personaliter aut per subexecutores seu receptores aut collectores seu nuntios speciales sive religiosos sive saeculares per vos deputandos ad omnia et singula monasteria subscripta transferatis, ibidemque quottas contributionum inferius designatas nec non quottas subsidii novissime impositi, unacum rationabilibus expensis vestris seu deputandorum vestrorum ab abbatibus, abbatissis, commendatariis, prioribus, priorissis dictorum monasteriorum seu ab eorundem abbatum, abbatissarum ac monasteriorum officiariis, cujuscunque dignitatis excellentur, aut vocationis fuerint, petatis, exigatis, requiratis, levetis et realiter percipiatis. Compellatis quoque ipsos et eorum quemlibet ad vobis ostendendum quittantias solutionum, contributionum seu quottarum hujusmodi a decem annis ultimate elapsis ac subsidii novissime impositi. Et si de ipsis aliqua arreragia seu quottas integras praedicti subsidii anno domini millesimo quadringentesimo nonagesimo nono impositi vos in totum aut in parteni non solvisse cognoveritis,||
ad easdem sommas et arreragia per eosdem debita integraliter sub censuris apostolicis et Ordinis solvendum et vobis satisfaciendum realiter compellatis et astringatis. De receptis quoque bonas et validas quittantias faciatis, detis et expediatis. Contradictorcs vero seu rebelles et inobedientes, ac dictas contributiones et subsidia cum restis et arreragiis nec non rationabilibus expensis solvere nolentes seu differentes per excommunicationis et aliarum censurarum ecclesiasticarum severitatem seu prolationem ad solvendum viriliter compellatis; eosque excommunicatos denuntietis et declaretis, saltem donec dictas contributiones, subsidia, restas et expensas rationabiles persolverint. Si vero postmodum eorum nonnulli delictum suum agnoscentes et ad cor redeuntes, hujusmodi solutionem vobis aut commissariis vestris faciant, damus vobis auctoritatem et potestatem eos cum poena salutari ab hujusmodi sententiis et censuris absolvendi. Et quidquid de hujusmodi contributionibus, subsidiis et restis receperitis, teneamini sub poena sacrilegii aut furti nobis seu nostro Generali Capitulo fideliter praesentare, expensis rationabilibus per vos aut vestros in harum rerum prosecutione factis ante omnia deductis et acceptis. Invocato ad praemissa et ea tangentia, si opus fuerit, brachii saecularis auxilio, consilio et favore. Omnibus igitur et singulis dictorum monasteriorum subscriptorum regularibus personis utriusque sexus firmiter damus in mandatis ac in virtute salutaris obedientiae et sub censuris Ordinis praecipimus, quatenus in praemissorum executione vobis tamquam nobis humiliter pareant ac devote obediant. Praesentibus vero in immediatum sequens triennium in suo robore duraturis. Sequuntur nomina et taxae dictorum monasteriorum: de Hylaria Septem flor. renens., de Cella Angelorum Septem flor., Paunnetperg (sic) septem flor., de Valle Dei septem flor., de Zwetzla decem flor., de Sancta Cruce quindecim flor., de Sancta Trinitate sex flor., de Novomonte sex flor., de Runa quindecim flor., de Victoria decem flor., de Campoliliorum duodecim flor., de Psitich sex flor., de Lansdtras sex flor., de Altovado septem flor., de Altofonte quinque flor. Datum in monasterio nostro Cistercii sub appensione sigilli nostri die quarta mensis Augusti anno domini millesimo quingentesimo secundo.

Source Fulltext: Zisterzienser-Chronik 12 (1900) S. 249-251