Wir Rudolff von Gottes gnaden Hertzog ze Osterreich, ze Steyr vnd ze Kernden etc. Bechennen vnd tu^en kunt offenlich mit disem brief vmb den brief, den die Zitzlinn vnser Judinn von Wienn vnd ir erben von den erbern vnd geistlichen frawn . . der Abtessinn vnd dem Conuent ze sand Nicla ze Wienn vmb zway hundert phunt vnd vier vnd zwaintzig phunt wienner phenning gehabt habent vnd den dieselb Judinn von der prunst wegen, die nv ze Wienn geschehen ist, verlorn hat, alz wir vernomen haben, daz wir wellen, ob derselb brief, der verprunnen sol sein, alz die obgenante Judinn vns hat ze wizzen getan, fûrsprach wurde, daz der tod vnd absey vnd fürbazz chain chraft hab, vnd ouch den egenanten Chlosterfrawn ze dhainem schaden nicht chome in dhainem weg, mit vrchund ditz briefs. Geben ze Wienn an Eritag nach sand Jacobs tag. Nach Christs gepurd Dreutzehen Hundert iar, darnach in dem ayn vnd sechtzigistem iar.

Source Fulltext: WEIS, Heiligenkreuz (=FRA II/16, 1859) S. 410-411