Wir Friderich von gotes gnaden Burgraue ze Nuremberge, Bekenne vnd tun kunt offenlichen mit disem brif, das wir reht vnd redelich, mit gutem Rate vnd vorbetrahdung, haben geeygent vnd eygen auch mit crafte ditzs brifs, den ersam geystlichen frawen . . der Ebttissin vnd der Samenung gemeinlich des Chlosters zu sant Nyclas, grawes ordens zu Winne, gelegen vor der stat, vnd allen iren Nachkumen ewiklichen den zehenden, der da gelegen ist zu Sweinwart, klein vnd grosen, ze Dorfe vnd ze velde, besuchten vnd vnbesuchten, mit allen seinen zugehorungen, wo der gelegen, oder wie das genant ist, als si den gekaufte haben von Niclosen dem Dratlaufe, Burger ze Winne, der von vns vnd vnser Herschafte ze lehen ginge, also das die egenanten frawen des egenanten Chlosters vnd alle ir nachkumen den egenanten zehenden mit allen seinen zugehorungen süllen fürbas ewiklich inne haben, nutzen vnd nizen für ein rehts freies eygen vnd da mit tun vnd lazen mügen, was sie wellen an alles irren vnd hindern vnser, vnser erben vnd nachkumen an alles geuerde. Des ze vrkunde vnd ewiger Sicherheit geben wir dem Closter vnd der Samenung disen brif, versigelt mit vnserm anhangenden insigel, der geben ist ze Nüremberg vf vnser veste nach Christes geburt drewzehenhundert iar vnd in dem sibenzigstem iar am Mitwochen vor Bartholomei.

Source Fulltext: WEIS, Heiligenkreuz (=FRA II/16, 1859) S. 415-416