Ich Chunrat von Arnstain vergich vnd tv^on chund alle den. die disen Prief lesent oder lesen hornt, die nv lebent vnd her nach chunftig sind. Daz ich mit meiner gueten vreunde rat vnd meiner hausvrown vron ofmein vnd aller meiner erben guetleichem willen meines vreins aygens cehen schilling geltes, die do liegent auf der mvle datz Pottenprvne div lanse Symons svn ze lehen von mir hat gehabt durch aller meiner vodern sell willen vnd mein selbs hail han geben div selb aygenschaft dem gotshaus des gueten herren sand Georgn datz Herzogenbu^erch vnd aller der Sammung des selben goteshaus zv ainem rehten aygen mit alle dem reht vnd nvzz vnd ich iz vnd mein vodern her praht habent vnd han auh in gelobt vnd mein hausvrowe daz vorgenant aygen ze scherm wo in des not geschieht als landes reht ist in Osterrich vnd sein auh des ir gewer an aller stat. vnd gieng wir in des scherms ab des ob got wil niht geschieht wie tannen schaden siv des nemen an chost oder an mve an dem aygen den schull wir in ab legen an alle wider red vnd an allen chrieg. vnd schullen auh daz haben auf alle dev wir haben in dem lande ze Osterrich. vnd daz dem goteshaus vnd der Sammung disev red stet vnd vnuerchert beleib dor vber gib ich vorgenanter Chunrat in disen prief ver sigelten vnd besteten mit meinem Insigel. vnd mit hern Gundackers insigel von Retelnperg vnd mit hern Ottens insigel des weissenberger von Retelnperg zv ainem rehten vrchund vnd zv gantzer stetichait. Des sind zeug her Chunrat von Tyrnstain her Dietreich Puehperger her wernhart von Nuzdorf her Olber von Gocesdorf Olram aus der awe Leupolt Smitsperger Hainreich Straibler vnd ander erber laeut genuech den die red wol chund vnd gewissen ist. Der prief ist geben do von Christes gepurd warn ergangen Tausent iar drev hundert iar dor nah in dem Nevncehenten iar an Sand Vrbans tag datz Herzogenburch in dem Goteshaus.

Source Fulltext: FAIGL, Herzogenburg (Wien 1886) S. 69-70