Ich Hainreich von Atzenprukke vnd ich Mechthilt sein hausvrowe wir veriehen vnd tvn chvnt allen den di disen prief lesent oder horent lesen. die nv lebent vnd hernach chvnftich sint. Daz Chadolt von Atzenprukke vnd sein hausvrowe vro Diemvt vnd ir erben von vns zv rechtem lehen habent an zehen phenning Sechs schilling wienner phenninge geltes vnd vier vnd dreitzich Chaese zwo Gense vier Hvener vnd sechtzich ayr geltes. daz alles miteinander leit auf fvnf hofsteten. die da ligent datz Traestorf. vnd zwai vnd viertzich wienner phenning geltes auf vberlent da selbens datz Traestorf. Die aigenschaft der selben gvlte vnd swaz dar zve gehort ze velde vnd ze dorf swie so daz genant ist, haben wir mit willen vnd gunst vnser svne vlreichs vnd Hainrichs vnd ander vnser erben mit verdachtem mute vnd mit gesampter hant zv der zeit do wir iz wol getvn machten geben auf den Alter sand lorgen in dem Gotshaus datz Hertzogenburch da pei ewichleich zv beleiben. So beschaidenlich. daz der vorgenant Chadolt von Atzenprukke vnd sein Hausvrowe vro Diemvt vnd ir erben die vorgesprochen gvlte alle vnd swaz dar zv gehort swie so daz genant ist fvrbaz zv rechtem purchrechte haben suln von dem egenanten Gotshaus datz Herczogenburch mit der beschaidenheit daz si vnd ir erben oder (wer) die selben gvlt nach in besitzet ewichlich alle iar davon dienen suln auf den Alter sand lorgen zehen wienner phenninge an sand Michels tage zv rechtem purchrecht vnd nicht mer. vnd haben auch wir vnd unser erben mit guetem willen vnd auch mit rechter furtzicht der aigenschaft der vorgenanten gvlte vnd swaz dar zv gehort swie so daz genant ist lauterlich vnd gentzlich verzigen vnd geauzzent vor allem chrieg vnd vor aller ansprach also daz weder wir noch alle vnser erben damit furbaz nicht mer suln ze schaffen haben weder mit vogtay noch mit anders nicht chlain noch groz daz lob wir ze laisten mit vnsern triwen an alles gevaerde. Vnd hat auch Chadolt von Atzenprukke vnd sein hausvrowe vro Diemvt vns geben vmb die selben aigenschaft der egenanten gvlte vnd swaz dar zv gehort. drev phvnt wienner phenning der wir recht vnd redlich gewert sein. vnd sein auch wir ich Hainreich von Atzenprukke vnd ich Maechthilt sein hausvrowe vnd ich vlrich vnd ich Hainrich sein svne vnverschaidenlich mit sampt vnsern erben der aigenschaft der vorgesprochen gvlte vnd swaz dar zv gehort swie so daz genant ist des egenanten Gotshauses datz Herczogenburch rechter gewer vnd scherm fuer alle ansprach als aigens recht ist vnd des landes recht ze Osterreich. Vnd dar vmb daz dise red fvrbaz also staet vnd vnverwandelt beleibe. da von so haben wir geben dem vorgenanten Gotshause datz Herczogenburch disen prief zv einem offen vrchvnde vnd zv einem waren gezevge. vnd zv einer ewigen vestnung diser sache versigelten mit vnsern insigeln. Diser prief ist geben ze wienne da man zalt von Christes geburt Drevtzehen hundert iar in dem ain vnd dreizgisten iar dar nach an sand Vlriches tage.

Source Fulltext: FAIGL, Herzogenburg (Wien 1886) S. 117-118