Ich Wernhart von Nvzdorf. vnd ich Lee von Freuntshausen. vnd ich Meinhart von Po^eting. vnd ich Gotfrid vnd Leutold paid prueder von Aino^ed. wir vergehen mit disem prief vnd tuen chunt allen den die in sehent horent oder lesent. daz ein chriech gewesen ist. von dem abt von varnpach. vnd von dem Probst von Herczogenburch. vnd von dem Probst von Sand Andre. an aim tail. vnd von dem Retelperiger vnd seinen erben an dem andern tail. vmb ein waid holcz vnd gru^et. vnd vmb ein wazer vnd wazers ganch. vnd habnt sie den selben chriech gentzleich an vns gelazen vnd habn wir den nach vnsern trewen peschaiden. also. daz von dem alten marchstain von Pheffing dericht vber nach einer snuer vncz an den alten marchstain vnter dem grasperig. swaz niderthalb marchstain ist. waid vnd grunt holcz vnd wazer. swie daz genant sei. daz schol furbaz immer sein an allen chriech der vorgenanten gotshaeuser. swaz auer oberthalb der marchstain ist. daz schol auch furbaz immer mer sein des Retelperiger vnd seiner erben auch an allen chriech. vnd habn auch beschaiden daz man den mulfanch weder oberthalb der marchstain nach niderthalb niht irren schol. vnd swer di schidung als hie verschriben ist verpreche. der wer der wider wette veruallen als wir emoln mit werten vnd mit briefen geschaiden habn. vnd zue einner stet der warhait gebn wir disen vnsern offen brief zue einem vrchund paidenthalben versigelten mit vnsern Insigeln der gebn ist datz Hertzogenburch. do von Christes gepu^erd ergangen waren Tausent vnd drew hundert Jar. vnd dar nach in dem drein vnd dreizigistem iar. an dem nesten samcztag vor sand Pauls tach der bescherung.

Source Fulltext: FAIGL, Herzogenburg (Wien 1886) S. 124-125