Ich lans Iohans sun von waydhofen vergich offenleich vnd tu^en chunt allen leuten an disem Prief die nu lebent oder her nach chuftig sint daz ich mit verdachtem muet ze der zeit do ich iz wol getu^en moht recht vnd redleich vnd ledichleich nach meinem tod geschaft han vnd gegeben dem erbern herren Probst Seyfriden vnd dem covent sant lorgen gotzhaus ze Hertzogenwùrch den hof ze glesperch, mit allen den czehenten di von alter dor in gehornt der mein erchauftz gu^et ist vnd von dem egenanten gotzhaus ze lehen han also weschaidenleich daz si mich darumb wegnat habent vnd alle iar die vorgenanten czehent die ich nach genaden von in westen scholt vmb ayn genanten dienst lazzen haben vmb zwen mut chorns vnd vmb zwen mutt habern di ich richten vnd fu^ern schol in iren chosten ze ragtz an sand michels tag vnd vmb zway phunt wienner phennig an sand Symons tag vnd nicht mer. wer awer daz ich den selben dienst an den egenanten tegen versezze vnd nicht verricht so schol ich selb oder zwen ander darum laisten vnd in varn mit zwayn pherften in ayn gasthaus ze ragtz wan mich der Probst vodert vnd do in ligen vnd laisten als recht ist in dem laut ze Osterreich vnd nicht auz chomen ist wert don der Probst vnd der Conuent dienstz vnd schadens der in dor auf get gericht vnd gewert iz schol auch der vorgenant Probst vnd der couent nach meinem tod mir vnd mein vodern vmb den vorgenanten hof vnd zehent ayn ewigen iartag wegen mit vigili mit selmesse vnd mit andern gueten dingen als seu gewanhait habent. ich schol auch auz dem egenanten czehent nichtes nicht versetzen noch verchaufen an ier wizzen vnd an iern willen tet ich dez nicht so pin ich gevallen von allen meinen rechten die ich an dem vorgenanten czehent han an allen chrieg vnd an alle wider red. daz lub ich pei meinen trewen. daz die red vnd die wandlung staet vnd vntzeprochen weleib gib ich vorgenanter ians lohans sun von waydhofen dem egenanten Probst Seifriden vnd dem conuent ze hertzogenwu^erch disen Prief versigelt ze aynem offen v^erchunt mit meinem anhangunden insigel vnd ze ayner bezzern sicherhait mit der Erbern herren insigel hern Chu^enracz ze den tzeiten techencz ze chrems vnd mit hern Ortolfs dez topler ze den tzeiten pharrer ze ragtz die diser sach czeug sint mit ieren anhangunden insigeln. Der prief ist gegeben nach christs gewu^erde dreuczehen hundert iar dar nach in dem fumf vnd vierczigisten iar an dem hevligen aufart tag.

Source Fulltext: FAIGL, Herzogenburg (Wien 1886) S. 177-178