Nos Leonardus Dei et Apostolice Sedis gracia Episcopus Patauiensis Notum facimus vniuersis et singulis presentes litteras inspecturis Litteras quondam Reuerendi patris domini Georii felicis memorie Patauiensis Episcopi predecessoris nostri immediati, eius uero Sigillo in pressula pargamenea ut prima facie apparebat impendente sigillatas sanas et integras omnique prorsus vicio carentes nobis per venerabiles in Christo sincere dilectum Johannem Prepositum Monasterii in Herczogenburg ordinis sancti Augustini canonicorum Regularium nostre diocesis presentatas recepisse per omnia in hec verba. Nos Georius etc. (Urkunde CCCXXII). Post quarum quidem litterarum exhibicionem humili et deuota instancia nobis per dictum Prepositum extitit suplicatum quatenus litteras easdem dei et ordinis intuitu ratificare approbare et confirmare graciosius dignaremur. Nos igitur attendentes ipsius Prepositi Monasterii in Herczogenburg supradicti iustam et deuotam peticionem et quod summa sit racio que pro religione facit, litteras memoratas ac omnia et singula in eisdem contenta ratificamus et approbamus nec non presentis scripti patrocinio in dei nomine confirmamus. Harum testimonio Litterarum Sigilli nostri appensione communitarum. Datum ad sanctum Ypolitum Mensis Junii die decimanona Anno Domini Millesimo quadringentesimo Tricesimo.

Source Fulltext: FAIGL, Herzogenburg (Wien 1886) S. 411