Wir Peter Scherer zu den tzeiten Puergermaister vnd Hanns Chelbl die zeit Richter der gancz Rat vnd gemain zu Egenburg Bekennen offenleich mit dem Brieff vnd tun kund menikchleich den Er fu^erku^empt vnd getzaigt wirt dy In lesent sechent oder ho^erent lesen daz wir mit guetem willen vnd gu^enstleicher lieb verhengt haben, dem Ersamen Herren Virgili Charherren zu Herczogenburg ze kchawffen den Hoff genant der Muenichhoff zu Egenburg in dem mittern groczen gelegen, den selben hoff haben wir ainmu^etikchleich erlawbt vnd geschafft zu verleichen Sannd Io^erign Gotzhaws zu Herczogenburg. In solecher beschaiden daz das selbig Gotzhaws oder sein Innhaber des selben Hoffs von dem selben Hoff ierleich dienn schol zu Sannd Johanns Gotztauffer Mess ...dy man spricht vnd ausricht In Sannd Johanns Cappellen des selben hoffs Newn schilling wienner phennig zu Sannd Jorign tag. vnd schullen auch ausrichten dy slecht Wacht als offt Sy dew berurt. vnd fu^er allew Robot vnd Stewr vnd gewo^enleich gastung der So^eldner oder aufsacz was der geuiel schullen sew phlichtig sein aws tzerichten zu Sannd Merten Tag ze geben ain phunt der Stat ze hilff. Auch schullen sew oder Ir Innhaber vnd mugen allen iren frum schaffen als ander vnser Mitpurger an menikleich irrung. Ausgenomen das schenkchen dar Inn wir In erlaubt haben Jerleich vier vass vnd nicht mer an vnsern willen. Auch schullen sew vns vnd vnser Stat Trewleich pey gesten In lieb alles vngeuerleich. Vnd des ze krafft vnd vrkund geben wir In den Brieff Pebart mit vnserm der Purger des Rat der Stat ze Egenburg Anhangunden Insigel für vns vnd für all vnser Erib vnd Nachko^emen Purger da selbs Der geben ist als man czalt Nach Christi gepurd vierczehenhundert Iar darnach in dem Sechs vnd dreizzigksten Iar des Mitichen in den Phingstueyrtegen.

Source Fulltext: FAIGL, Herzogenburg (Wien 1886) S. 429-430