Ich Prueder Ortolf, ze den zeiten Phleger vnd Maister des Gotshauses dacz dem heiligen geist ze Wienne veriche vnd tuen chunt allen den, die disen prief lesent, oder horent lesen, die nv lebent vnd hernach chvnftich sint. Daz der erber man her fridreich, hern Wolfgers||
sun von awe vnd sein hauswrow vrow Elspet mit guetem willen vnd gunst aller irer erben, vnd mit gesampter hant ze den zeiten, do si ez wol getuen mochten vnd mit meiner hant verchauft habent iren weingarten ze Vtelndorf, der do leit an dem hintern perige, des ain Jeuch ist des ich rechter Stifter vnd stoerer pin; denselben weingarten habent si gegeben mit alle dem nucze vnd recht, als si in her bracht habent, marchtes perchrechtes gewer vmb sechczig phunt wienner phenning, der si recht vnd redeleichen gewert sint, dem Erbern manne, dem vorgenanten herrn wolfgern von awe, vnd seiner hausvrown vrown Christeineinen vnd allen irn erben furbaz ledichleichen vnd vreileichen ze haben, vnd allen iren frumen da mit schaffen . Ez hat auch die vorgenant vrow Christein den egenanten herrn Wolfgern von awe, iren wirt mit demselben weingarten gewert aller dinge seiner rechten margengabe. Vnd daruber durch pezzer sicherhait, so sezzent sich die vorgenanten her fridreich von awe, vnd sein hausvrowe vrow Elspet seinem vater hern wolfgern von awe, vnd seiner hausvrowen vrown Christeinen vnd allen irn erben vber den egenanten weingarten fuer sich vnd fuer alle ir erben ze rechten gewern vnd scherme fur alle ansprache. - - Dar vber so gib ich vorgenant prueder Ortolf hern Wolfgern von awe, vnd seiner hausvrown vrown Christeinen vnd allen iren erben disen prief ze einem offene vrchunde, vnd ze ainen waren gezeuge diser sache versigelten mit meinem insigel. Vnd sint auch des gezeuge herr Wernhart der schiver, her vlreich der hofmaister, Gerunch, der Speismaister, Dietreich der Schifer, Engendiech, der Mavrpech, Durinch von Meurlinge, herman von vreisinge vnd ander frume leut genuech, den disev sache wol chunt ist. Diser prief ist geben ze wienne, da von Cristes gepu^ert waren ergangen drevzehen hundert||
Jar, in dem zweliften Jar darnach an dem liecht Messe tag ze vnser vrowen.

Source Fulltext: ZEIBIG, Klosterneuburg (=FRA II/10, Wien 1857) S. 131-132