Ich průder Heinreich von Castel, Cumentevr zv Mevrperg vnd an des Maisters stat zv O^esterich vnd zv Steyr vergich vnd tvn chunt allen den, die disen prief lesen, horen, oder sehen, daz ein Chrick gewesen ist, vnd auch lange gewert hat zwissen dem erbern Manne probst Perhtolden von Neunburg vnd pruder Heinrichen von Pru^ensendorf Cumentevr ze Wien des Ordens sende Johans vm zwen Emmer weins vnd zwen phenning, di im der vorgenant Probst Perhtold solt gedient haben von iar ze iar vnd dem Hovs ze Wien auf sende Michelstag Perchrechtes von der Pevnt auf dem Nuzpach, vnd des er nicht getan hat vnd mang iar vnd tag versezen hat. Daz derselbe Chrick also zwissen in verrichtet ist, daz der vorgenante Probst Perhtold dem vorgenanten pruder Heinrichen von Prunsendorf, vnd dem hovs ze Wien peschaiden hat zwen Emmer weins pergrechtes vnd zwen phenning ewichleichen ze dien von einen weingarten ze Grincingen in dem Luzzen, der do ist des Paltrams auf der slachstuben. Des sint gezeugen Pruder Thomas der Chelner von Neunburg, Johannes von Nuzdorf, Rudger von der heiligen stat vnd ander erber Levt vn daz daz allez stete peleibe vnd vnzeprochen, dar vber gib ich dem vorgenanten probst Berchtold disen gegenburtigen prief versigelt mit des Convents Jnsigel zv Mevrperg. Der prief ist gegeben ze Wien in dem Hovs ze send Johans, Do noch Christes gepurt ergangen waren Tausent jar Drevhundert jar, vnd do noch in dem viercehtem Jare.

Source Fulltext: ZEIBIG, Klosterneuburg (=FRA II/10, Wien 1857) S. 146-147