Ich Engelbrecht der alt Sluzzler, Amptman ze Newnburch meines herren des Herczogen von O^esterreiche beczeuge - Daz Ruedolf vnd Hainreich, die zwen Prueder, hern Ulreiches svn von Chriczendorf, dem Got genad, Dem Ersamen herren Probst Perchtolden vnd dem Gotshaus ze Newnburch mit meiner hant, wann ich sein rechter Perchmaister pin von wegen meines herren, des Herczogen von O^esterreiche ze rechtem scherm nach des landes recht in O^esterreiche geseczet habent irn weingarten, der der halser ist genant fu^er den acher, der pei dem GO^ezzleins see gelegen ist, den si demselben herren Probst Perchtold durch recht notdurft des geltes, daz in ir vater, der vorgenant herr Vlreich ze gelten lazzen hat - verchauffet habent vmb virczich Mark lO^etiges silbers, des si auch hincz den Juden gar vnd genczleich gewert vnd verrichtet sint - gib ich - disen Prief - mit meinem Insigel versigelt. Dis sint des geczeuge her Wernhart der Schiver, Dietreich sein svn, Fridreich der huetstoch, Symon von pellndorf, herman von freysinge, Chvnrat, Rudwein, Engeldiech, Gvndolt, wisent von Egenburch, Peter freysinger, Jacob der Chelner - Diser prief ist gegeben ze Newnburch - drevzehenhundert Jar dar nach in dem fvmfczehenden jar des nachsten eritages vor sand veites tag.

Source Fulltext: ZEIBIG, Klosterneuburg (=FRA II/10, Wien 1857) S. 150