Ich Chunrat der Veltzer, ze den Zeiten Rihter vnd der Rat vnd auch die Purger gemain ze Newenburch marchthalb wir veriehen - daz Marquart der Poghart, dem got genad, geschafft vnd gegeben hat mit rat vnd mit gunst seiner hausfrowen vron Margreten - den ersamen vnd geistleichen herren ze Newenburch Chlosterhalb in ir Oblaye iren weingarten, der gelegen ist an Mukkerawer perig ze den Reuttern, des ein halbez Jeuch ist der gelegen ist ze nechst des Meuer weingarten mit so beschaidner red, daz die vorgenanten herren alle iar ierleich sullen davon hegen zwen Jartag, ainen des dritten tages vor sant Philippes tag, den andern an dem vierden tag vor vnser vrowen tag ze der schidung - Auch hat die vorgenant vrow Margaret daz vorgenant gescheft vnd die gab des selben weingarten bestette vnd stet gehabt nach ires vorgenanten wirtes tod mit so vzgenomner red, daz si den vorgenanten weingarten enphangen hat ze einem rehten leipgeding zv iren tagen - Des geben wir disen prief - besigelten mit vnser Stat Insigel. Der prief ist geben in vnser vorgenanten Stat marchthalbe ze Newenburch - dreuczehenhundert Jar in dem zwai vnd zwainczigisten Jar an dem nechsten vreitag nach sand Jacobes tag.

Source Fulltext: ZEIBIG, Klosterneuburg (=FRA II/10, Wien 1857) S. 188