Johannes Episcopus, Servus Servorum Dei Venerabili fratri, Archiepiscopo Salisburgensi Salutem et Apostolicam benedictionem. Ad audientiam nostram pervenit, quod tam dilecti filii N. Prepositus et Conventus Monasterii Neumburgensis per prepositum soliti gubernari ord. s. August. Patav. Dioc., quam Predecessores eorum decimas, terras, domos, vineas, grangias, piscarias, Castra, Casalia, prata, pascua, Stagna, lacus, nemora, molendina, iura, iurisdictiones et quedam alia bona ipsius Monasterii datis super hoc litteris confectis exinde publicis instrumentis factis, renuntiationibus interpositis, juramentis et penis adjectis in gravem ipsius Monasterii Lesionem, nonnullis Clericis et Laicis aliquibus eorum ad vitam, quibusdam vero ad non modicum tempus et aliis perpetuo ad firmam vel sub censu annuo concesserunt, quorum aliqui dicuntur super his confirmacionis litteras in forma communi a Sede Apostolica impetrasse. Quia vero nostri interest, super hoc de opportuno remedio providere, fraternitati tue per Apostolica scripta mandamus, quatinus ea, que de bonis ejusdem Monasterii per concessiones huiusmodi alienata inveneris illicite vel distracta, Non obstantibus litteris, instrumentis, renuntiationibus, juramentis, penis et Confirmationibus supradictis ad jus et proprietatem ejusdam Monasterii legitime revocare procures. Contradictores per censuram ecclesiasticam, appellatione postposita, compescendo. Testes autem, si fuerint nominati, si se gratia, odio, vel timore subtraxerint, censura simili, appellatione cessante compellas veritati testimonium perhibere. Datum XII. Kal. Novembris Pontificatus nostri anno Octavo. G. de Valle. Jo. Casy.

Source Fulltext: ZEIBIG, Klosterneuburg (=FRA II/10, Wien 1857) S. 195-196