Wir Nyclas der Polle, ze den zeiten Bvrgar Meister vnd der Rat von der Stat ze Wienne veriehen - Daz die Erwaern Geistleichen Vrowen, die Nvnnen ze sand Marien Magdalen for vns chomen vnd chlagten vns Iren gepresten vmb Ir zwo Pastuben, die sie vor Schotentor hieten, daz In da van so vil niht wurde, sam sie Jerlichen dar avf musten legen vnd wurden ze Rat mit sampt vns, daz sie die ainen fuder liezzen gen, so wurd dev Ander dester Gvldiger. Da van haben wir In die gnad getan, daz wir verpieten Ernstleich, daz furbaz nieman Ander dhein Pastvben vor Schotentor pawen svl bei vnsern hulden, an als vil ob sie sich bedehten daz sie ein ander Pastvben da pawen wolten, dez sullen sie gewaltich sein vnd anders nieman. Daz ditz Gescheft furbaz stete sei vnd vnzebrochen beleibe, Dez geben wir den egenanten vrowen disen Brief - Versigelt mit vnser stat Insigel. Diser brief ist geben ze Wienne - drevzehen hvndert Jar in dem vier vnd zwaintzgisten Jar an sand Cholmans Tage.

Source Fulltext: ZEIBIG, Klosterneuburg (=FRA II/10, Wien 1857) S. 209-210