Ich Chůnrat Chrephel vnd ich Margret sein hausvrowe vnd vnser erben wir veriehen - Daz Chu^enrat, Liepharts svn mein sweher vnd Pericht sein hausvrowe vnd Vlreich der schuler i\er paider chint haben gestift vnd geschaffet ainen ebigen Jurtach - mit einem phunt wienner phennig, do man alle iar vm chauffen sol an sant Nyclas tag prO^et, fleichs vnd wein dem Pharrer von der Heiligenstat - vnd denselben Jar tach sol ich - hegen von einem weingarten - leit daz Toblich auf den seczen - vnd ist ein halbes Jeuch, dinet zwen emmer weins vnd drei helbling ze Perchrecht den Geistleichen vrowen hincz Tuln in daz chloster, sev habent auch geschaffet auf denselben weingarten ein halbez Phunt geltes derselben Mu^enzz - Junchvrowen Katrein irer paider tochter hintz Tuln in daz e genant vrowen chloster, daz man ir alle iar dienen sol vncz an irn tod. - Dar vber geb wir disen prief versigelten mit vnsers perchherren insigel Engelprechtes von Toblich ze den zeiten Phleger vnd perchmaister der oft genanten Geistleichen vrowen von Tvln in dem chloster vnd mit hern Walthers Insigel ze den zeiten Pharrer datz der Heiligenstat. - Dies sind auch gezeug Wolfhart der Laurein von Grinczingen, Marchart Laurein sein průder , vnd Paul vnd Eberhart von Grinczinge vnd ander frumm leut genuech. - Der prief ist gegeben - dreuzehen hundert Jar, darnach in dem naun vnd zwainczigistem Jar an vnser vrowen tag ze der Liechtmesse.

Source Fulltext: ZEIBIG, Klosterneuburg (=FRA II/10, Wien 1857) S. 231-232