Ich Michel von Triweswinchel vnd Ich Margret sein Swester, wir veriehen - Daz der erber man, Cholman von Enczeinstorf vnder dem Pusenperge vnd sein erben von vns ze rechtem lehen haben gehabt ein lehen, daz da leit da selbens ze Enczeinstorf - Die aygenschaft des selben gutes haben wir - verchauft vnd geben vmb vier phunt wienner phenning - dem vorgenanten Cholmanne vnd seiner hausvrowen, vron Jeuten - vnd wan mein swester Margret noch nicht vogtpaer ist, do von sv sezze ich mich - ze rechtem gewer vnd scherm - so lange, uncz daz mein Swester Margret vogtpær wird, vnd sich der aygenschaft des egenanten gutes genczleich verezeicht vnd pestaetiget nach des Landes recht ze O^esterreich, vnd gib in dar vber disen prief - versigelt mit meinem Insigel vnd mit herrn Fridreichs insigil von Aczenpruck Diser prief ist geben ze Wienne - Drevtzehen hundert Jar in dem Nevn vnd zwainczigistem iar darnach des naechsten Svnntages vor dem Palm tage.

Source Fulltext: ZEIBIG, Klosterneuburg (=FRA II/10, Wien 1857) S. 232