Wir Wolcher, Gerung, Hartung, Seifrit am end, Perchtolt an der Newstift, Wilhalm von Salmansdorf, Amptleute ze obern vnd ze Nydern Suferingen, ze Newstift, Vnd ze Salmansdorf, Wnd wir Tyeme der zetter, Chůnrat der Lange, Nycla, Hainreich, Pru^esnich, Erberger, Nycla, Erman, Hausgenozzen in den vorgenanten Dorfern veriehen offenbar an disen prief, daz wir vnverschaidenleichen vns verpunden haben fu^er di gemain der egenanten vir dorfer dem Gotshaus zu der heiligen stat ze chauffen funf phunt gelts e‚ daz man di\e Capelle ze Suferingen Weich, acht tage mit der beschaidenhait, ob man der vorgenanten phenning gult nicht vail funde, So schul wir den Erbern Herren, dem Probst von Neunburch vnd seiner Samnung geben in im Sagrer imer fur ein phunt geltes zwelf phunt phenninge Wyenner munzz. Vnd swo wir die vorgenanten gult nicht chauften dem vorgenanten Gotshauss ze der Heiligenstat an dem vorgenanten tage, oder die phenninge, di\e do fu^er gevallent, Swelch dan der Probst von Neunburch fodert aus vns allen, oder Swi mangen, die schulten ze Nevnburch in varn in ain Erber Gasthaus, do man in hinzaiget, vnd do inne liegen, als inligens recht ist, vnd nicht auschumen, iz werd den Gotesheusern ze Newnburch vnd ze der Heiligenstat volfu^ert genzleich, als da vorgeschriben ist, vnd wider gecheret aller der schade, den si\e dez gutes an die Juden nement. Dor vber gib wir dem vorgenant Probst ze Newnburch vnd der Samnunge disen Prief versigelten mit dez Erwirdigen Herren, Hern Morizen Insigel dez Aptes von den Schotten ze Wyen, Wa\en wir selb nicht aigenes Insigel haben. Der prief ist geben - Dreuczehen hundert Jar, dor nach in dem dreizigesten Jar an sand Georientag.

Source Fulltext: ZEIBIG, Klosterneuburg (=FRA II/10, Wien 1857) S. 235-236