Wir Albrecht von Gotes genaden Herzog cze O^esterrich vnd ze Steyr Tuen Chunt offenleich mit disen prief, Daz wir durch die getriwen dienst, die vns vnser getrewen lieben Ott vnd Geori die Marchburger, vnd auch vnsern pru^edern getan habent, vnd auch noch wol getuen mugen vnd sullen, in die gnad getan haben, vnd tuen auch mit disem prief, daz sev allev die Lehen, die si von vns vnd von vnserm lieben pru^eder Herczog Otten habent. wol getailen mu^egen mit vnserm willen also beschaidenleich, ob ir ainer abgieng vnd sturbe an Leibs erben, die Chnecht sein, daz dann die selben Lehen, wie die genant sein, wider gevallen sullen an dem andern, vnd an sein Lehen erben in aller der Weis, als si vngetailt waren. Vnd dez zu einen vrchunde geben wir disen prief versigelt mit vnserm Insigel, Der geben ist ze Wienn, do man zalt von Christes gepu^ert Dreuczehen hundert Jar, darnach in dem Dreizzigistem iar an dem Mitichen vor sand Veites tag.

Source Fulltext: ZEIBIG, Klosterneuburg (=FRA II/10, Wien 1857) S. 238