Wir Albrecht von Gots Gnaden Herzog ze Osterreich, ze Steyr, vnd ze Kernden, Herre in Chrayn, auf der Marich vnd ze Portenaw, Graf ze Habspurch vnd ze Chyburch, Lantgraf ze Elsazzen vnd herre ze Phyrt Veriehen vnd tun chunt offenlichen mit disem brief, daz Wir wol beweiset vnd ermant sein, Vnd auch vns des Erchennen Vmb den Hochwerd bei Newnburch, der weilent des Stu^echsen gewesen ist, daz der vnd auch die Aigenschaft desselben Werdes des Gotshawses ze Newnburch gewesen ist, Vnd den Probst vnd den Convent daselbs ze recht angehoret, darvmb so haben Wir die Aigenschaft desselben Werdes demselben Gotshaus ze Newnburch widergeben, Vnd geben auch mit disem brief, Vnd Verzeihen auch vns derselben Aigenschaft, ob Wir dhain recht daran hieten, also, daz Probst Ru^edwein ze den zeiten Probst ze Newnburch vnd der Convent vnd alle ir nachchomen desselben Gotshauses ze Newnburch denselben Werd vnd die Aigenschaft mit Schut vnd mit Vischwaid vnd mit allem dem, daz darzu gehO^eret, fu^erbaz ledichleichen haben sulln, alz di dazselb ir Gotshaus ze Newnburch Vorgehabt hat, vnd bestetigen in daz fur vns vnd vnser erben vnd nachchomen mit Vrchund des brifs, der geben ist ze Wienn an Vreytag nach des Heiligen Chreutztag ze Heribst - dreuzehen hundert iar, darnach in dem Vierzgisten Jar.

Source Fulltext: ZEIBIG, Klosterneuburg (=FRA II/10, Wien 1857) S. 279