Ich Nyclas der Drescher vnd ich Clar sein hausvrow wir veriehen - Daz wir - Gegeben haben dem Erwirdigen Geistleichen herren Brobst Ru^edwein des Gotshauses vnser vrown ze Newnburch Chlosterhalben vnd dem Convent gemain des selben Gotshauses - Vnser haus vnd einen Paumgarten hinden dar an, daz gelegen ist daselbens ze Newnburch Chlosterhalben pei dem Gygricz, da man alle iar dem egenanten Gotshause von gedient hat Drev phunt wienner phenning ze rechtem Purchrecht - vnd habent auch si vns darvmb ledich vnd vrey lazzen des dienstes, den wir in von den drein weingarten alle iar dienen suln, die ich egenant Niclas von in ze leibdinge haben Sol vncz an meinen tod, vncz daz wir Dreuzehenthalb fuder weins, ie zwen vnd Dreizzich Emmer weins fur ein fuder, genczleichen in gevessen, vnd von dem selben dienst gewert werden - dar vmb so geben wir in disen prief - versigelt mit vnsern Insigiln. Der prief ist geben - Dreuzehen hundert iar, darnach in dem eins vnd vierczigisten iar an sant Johans abent ze Sunnwenden.

Source Fulltext: ZEIBIG, Klosterneuburg (=FRA II/10, Wien 1857) S. 282