Ich Weichart von Toppel, Hofrichter in O^esterreech vergich, daz fu^er mich chomen ist in daz hoftayding, do ich saz an ainem rechten, der beschaiden Chvnrad der Pab vnd chlagt hincz dem Erwirdigem Herren Brobst Ortolfen ze Neunburch vmb ein hof gelegen dacz Antental, des in Brobst Rudweins anwult von seins geschaefts wegen mit gewalt entwert hiet, des er enkolten hiet vmb zway vnd dreizzich phunt phenning wienner Mu^enzz ‚ vnd saez auch Brobst Ortolf noch an dem selben gewalt, vnd pat gerichts, do antwu^ert Brobst Ortolf mit vorsprechen, vnd Jach, er west nichtes nicht vmb den gewalt, vnd der hof gehO^ert ze seinem Gotshaus, des er nu verweser wer von gots genaden, vnd pat die herren, daz seu im ein recht sprechen, do ertailten im die Lantherren, geviel auch im, mit vrag vnd mit vrtail, seyt er den hof, vnd waz dar zu^e gehO^ert, geruebtleichen inne hiet gehabt pei gu^etem gericht, recht taeg vnd mer, er scholt fu^erbaz chain recht dar vmb dulden, noch leyden, vnd auch an der gewer siczen vnd beleiben, vnd allen seinen frum da mit schaffen, verseczen, verchauffen, als ez im vnd seinem Gotshaus aller pest fuegt vnd geczem ‚ mit vrchunt des priefs geben ze wienn am Mitichen nach der Phingstwocben - Dreuzehen hundert iar, darnach in dem zway vnd fumfczigisten iar.

Source Fulltext: ZEIBIG, Klosterneuburg (=FRA II/10, Wien 1857) S. 336