Frater Michael humilis prior generalis et servus fratrum ordinis sancte Dei genitricis Marie de monte carmeli. Dilecto nobis in Christo dno. colmanno preposito neuburgenssi cum omnibus collegiatis salutem et per oracionum suffragia regna celestia feliciter promereri. Affectum benivolum, quem ad nostrum geritis ordinem, prout fratrum nostrorum intelleximus oraculo vive vocis, diligencius attendentes et in dno. comendantes quo ad ea precipue, que salutem continent animarum, quantum cum domino possumus, vobis vicem cupimus refundere salutarem. Quare in omnibus missis, orationibus, predicationibus, confessionibus, jejuniis, abstinentiis, disciplinis, vigiliis, laboribus ceterisque bonis omnibus ac beneficiis vniversis, que per nos et omnes fratres nostri ordinis vbique terrarum dignabitur misericorditer operari clemencia salvatoris, tam in vita, quam post mortem vos participes facimus et consortes, Addicientes nichilominus, et de speciali gracia concedentes, vt cum obituum vestrorum memoria in nostro generali capitulo fuerit recitata, idem pro vobis fiat, quo ad vniversa et singula, que pro defunctis nostri ordinis fratribus ibidem fîeri consweverint. In cuius rei testimonium sigillum nostri generalatus officii presentibus est appensum. Datum in nostro generali capitulo babenberge in festo pentecostes celebrato. Anno Dni. Millo. CCC°. LXXXV.

Source Fulltext: ZEIBIG, Klosterneuburg (=FRA II/28, Wien 1868) S. 31