Ich hiersl der Jud von Lempach vnd ich Jochant sein hausfraw - veriehen - das wir - verchauft haben alle die hab, die wir gechauft haben von dem edeln herren, hern Hainreichen dem Aczenprukker vnd vrawn vrslein, sein hausfrawe, als vnser chauf prief sagt - ausgenomenleich den hof, der do dient dem erberdigen herren dem probst von Chiemse - als, ein hof gelegen ze Tawtendorf vnd ain hofstat doselbs etc. - vnd vnser gut gelegen ze Obern Rorr - vnd daz lehen ist von dem Edeln hochgeporen fursten hertzogen Albrechten in Osterreich, vnd vnsers aigens ain holcz gelegen an dem haschpang vnd aindlef schilling pfenning gelegen auf ainer Mu^el zu Tawtendorf der man iarleich dient an sant Michelstag ain pfunt phenning vnd ze Weihnachten fuer ein Diech Rintfleischs funfczk phenning, vnd ze Ostern fuer ein Chelberspawch vierczgk pfenning - der pfarrer ze heiligenaich ain halbe henn ze vogtrecht vnd dacz weinczu^erl das dorfgericht das viertail vnd all vnser fischwait - vnd halb zehent ze Tawtendorf vnd ze Eberhartzdorf vnd ze O^ed weinzehent clain vnd grozz zu dorf vnd zu veld gelegen in heiliger Aicher pharr, vnd die ze lehen sind von dem Erbern wolgepornen herren von den Grafen von Gorcz, Symon ze Thiemdorf von ainer hofstat vier vnd sechczig phenning vnd zwen Metzen ruben oder acht phenning vnd do selbs ain halben Mutt chorn auf purkrecht ekchern vnd funfzehn phenning gelts, vnd daz ze lehen ist von dem Edeln wolgeporn herren von den Grafen von Maidwurg, vnd mein haws ze Tawtendorf, das halbs freys aigen ist, vnd das halb haws ist purkrecht von dem erwirdigen herren von dem probst ze newburg - dem erwirdigen herren probst Cholman ze neunwurg vnd dem Convent gemain des Goczhaus daselbs chlosterhalben vmb fvnfthalb hundert phunt gemainer wienner phenning - Dar vber so geben wir - den prief - versigelt mit der erbern herren Gotschalichs des Inprukker, die zeit Purkraf ze Starhenwerg, vnd Seifrids des Mem anhangunden Insigeln - Des chaufs vnd der sach sint czeug der erwerig herr her Jorg der Sewekch vor dem Turn, vnd Wolfhart vnd Cristan, die Mutzesperger paid gepru^eder - Der prief ist geben - drewczehnhundert Jar, dor noch in dem Segs vnd Achczigistem Jar des nachsten Sampcztags vor sand Vlreichs tag des heiligen peichtiger.

Source Fulltext: ZEIBIG, Klosterneuburg (=FRA II/28, Wien 1868) S. 40-41