Fridericus dei gratia dux Austrie et Styrie et dominus Carniole omnibus hanc paginam inspecturis in perpetuum. Cum non solum nostris temporibus nostra deuote desideret celsitudo de hiis, que specialiter de sinu nostre magnificentie poterunt emanare, ecclesiarum libertatem fauorabiliter augmentare, verum etiam de singulis, que nostrum beniuolum per consensum ac operam diligentem per fideles nostros ad laudem dei et commoditatem quarumlibet ecclesiarum fieri contigerit, gloriemur, presentis scripti protestamur testimonio, nos contractui huiusmodi affuisse, vbi Hertnidus de Ort fidelis noster pro remedio sue anime et pariter parentele sue nec non pro centum et quindecim talentis Winnensis Monete pecunie persolute renuntiauit publice omni iuri et pariter exactioni, quam in possessionibus ecclesie in Chremsmvnster, quotcunque nomine censeantur, hactenus antecessores sui et ipse dinoscitur habuisse hiis dumtaxat exceptis, quod singuli, qui fuerint rei mortis, ipsi Hertnido uel iudici suo debent cum hiis, que cinguntur cingulo, assignari; de hiis similiter, qui Heistalt uulgariter nuncupantur, nullum babere prorsus debet iudicium uel etiam potestatem. Vt autem huiusmodi contractus robur optineat perpetue firmitatis, presens scriptum in euidens testimonium omnium premissorum ad peticionem parcium sigilli nostri munimine iussimus roborari coram testibus subnotatis, Qui sunt comes Vlricus de Phannenberch, Hermannus et Otto fratres de Ortenburch, comes Willehalmus de Hevnenburch, Otto de Slivnz, Wernhardus et Heinricus de Schovenberch, Liutoldus et Vlricus de Wildonia, Albero de Pollenheim, Vlricus de Chirchlinge, Ditmarus de Steier, Hertwicus de Aptaei, Chunradus et Ernsto de Asperch, Hertwicus de Peutenbach, Heinricus Dens, Merboto de O^ede et alii quam plures. Actum apud Wels anno ab incarnatione domini M. CC. XLI. XII kalendas marcii.

Source Fulltext: OÖUB 3 (Wien 1862) S. 98-99, Nr. 94