Wir Fridreich Abt und der Convent von Krembsmunster thun kund allen den, die disen Brief ansehent oder hörnt lesen, das ver Kunegund von Kirchperg Hern Hertingis Tochter von Mulperch vnnserm Siechhaus lediklich und williklich gegebn hat Irn Hoff datz Ha^ening mit zehent und mit aller Güllt, der sy aneribt von irm Vater, und dinst alle Jar an sand Nicklas Tag viertzigk Phenign in vnnser Brobstey, und ein Hueb datz Chumbrechtstorff, dew auch ir Erb ist gewesen, vnd dinnt in di Kamer LX. Phenign an vnnser Frawn Tag, pey Ir lembtign und gesuntn Leib also, das man ir gebn sol alle Tag aus vnserm Kheller ein Kcha^endel Weins, des man dem Convent geyt, und in vier Aderlassen des Tags zway Kchandel vnd von vnnser Phister alle Tag ainen Herrnlaib vnd ze yglich Quottember drey Schilling Phennign von dem Siechhaus, darvber sol sy merern vnd mynnern Zehent von dem Hoff datz Ha^ening vnd alles, das dew Hueb von Chumbrechtstorff dint, habn irn Tagn vnd so sy nymer ist, sol der selb Zehent merer vnd mynner vnd alles, das dew vorgenant Hueb gilt, an alle Ansprach zu dem Siechhaus geho^ern mit allem Recht, vnd wan ir Trew an vnnserm Gotzhaus gethan hat mit solcher Gab, pint wir vns mit disem Brieff darzu, das wir ir und aller Ir Vordern Jartag begen mit Vigili vnd Mess nach gemainer Gewonhait vnnsers Klosters, vnd das der gewerft sta^et vnd vnverchert ewigkleich beleib, geb wir ir disen Brief ze Vrkundt bewartn mit vnnsern baidn Insigln. Der Sach Getzeug sind Her Hainrich vnd Her Pernhart von Achlewten, Her Vlrich Rot, Her Lebtold von Pernaw, Janns, Konrad, Philip von Lautterbach, Hainrich, Ditmair, Perchtold von Ottstorf, Ditmar und Konrad Poseth, Konradt von Assperkch, Vlrich Tristam, Friderich von Aich, Dittrich der Brobst. Diser Brif ist gebn, do von Kristes Geburd warn Tawsend vnd drew Hundert Jar an Sand Ottmars Tag.

Source Fulltext: OÖUB 4 (Wien 1867) S. 355-356, Nr. 382