Nos Leupoldus dei gracia episcopus Babenbergensis recognoscimus publice per hec scripta et constare volumus presencium inspectoribus universis, tam presentibus quam futuris, quod ad petitionem et rogatum honorabilis viri in Christo nobis dilecti domini Friderici venerabilis abbatis monasterii in Chremsmunster, ordinis sancti Benedicti Pataviensis dyocesis consensum nostrum expressum et voluntatem liberam adhibuimus et presentibus adhibemus, ut idem abbas ac dictum monasterium jus emphyteoticum, quod vulgariter dicitur Chavfreht curie nostre in Gaerstental site, dicte in Schachen, quam quondam inhabitabat et coluit Heinricus dictus Stainwentär et duorum novalium sitorum in loco dicto Puechrigel, quod idem abbas nomine dicti sui monasterii comparavit, quiete deinceps possidere valeant et tenere salvis tamen nostris et nostre ecclesie juribus, que nobis et dicte nostre ecclesie bonis competunt in eisdem; videlicet quod a dictis bonis census, steuras et quelibet alia jura debita et consueta nos et nostri successores ac nostre ecclesie officiati non obstante contradictione cujuslibet sicut a ceteris colonis et bonis nostris ibidem situatis requirere et habere libere valeamus. Testes hujus sunt: Fridericus de Truhending et magister Johannes de Rinekk, canonici ecclesie nostre Babenbergensis, Chunradus, notarius noster, canonicus ecclesie sancti Stephani ibidem, Heinricus de Eglolfstain, Jesnitzarius burcgravius in Chlausa, Ulricus de Hag, Chunradus Raeutaer et quam plures alii fidedigni. In cujus rei testimonium perpetuum et evidenciam pleniorem presentes litteras dicto monasterio dedimus sigilli nostri robore communitas. C. Datum in Chremsmunster anno domini M°.CCC°. VIII Kalendas Novembris.

Source Fulltext: OÖUB 5 (Wien 1868) S. 598, Nr. II (Anhang)