Ich Weigant von Chritzendorf ze den zeiten Rihter und wir der Rat mit sampt der Gemeine der Stat ze Hertzogen Neunburch vergehen offenchlich und geben ze erchennen allen den, die disen Prief lesent oder ho^erent lesent, die nu lebent und hernach chu^enftige sint, datz der Ersam man Apte Friderich und deu Samenunge des Gotes hu^eses ze Chremsmunster reht und redelich umb ir ledich gu^et gechauffet habent wider Swoerzleins erben des Juden von Wien, wider Moysen, Morochay, Pezach und ysaac einen weiugarten, heizzet der Elsazzer, des Drithalp Geuch sint, und leit an der Stegleiten umb hundert phunt und umb dreu und dreizch phunt phenning wienner mu^enze, habent auch si die Juden der selben pfenning gar und gaentzlich gewert, habent auch sich die Juden mit sampt ir Hausfrowen und mit gunst und mit willen aller ir erben des vor genanten weingarten reht fu^erziht getan und habent in dem vor genanten Gotes hu^ese auf gegeben ze rehtem Perchreht mit Gebharts hant von Sanct Mertein zwei Geuch, deu ligent in hern albers Perchreht von Chu^enringen und mit Gundolts hant ein halbez Geuch, daz leit in hern Greiffen Perchreht von Wienn. Habent auch die selben Perchrneister Gebhart und Gundolt dem e genanten Gotes hu^ese ze Chremsmunster deu e geschriben Drithalp Geuch verlihen ze rehtem Perchrehte und under dem dienst, als ez mit alter gewonheit her chomen ist also, daz daz vorgenant Gotes hu^es ze Chremsmunster den e geschriben weingarten ledichlich und freilich haben suln ze rehtem Perchreht allen ir frum da mit ze schaffen, versetzen, verchouffen, geben swem Si wellen an allen Irresal und die vor genanten Juden Moyses und sin Hausfrowe Pitlinch, Morochay und sin Hausfrowe Poefel, ysaach und sin hausfrowe Anna, Petzach und sin hausfrowe Rachel habent dem vorgeschriben Gotes house ze Chremsmunster gesatzt ir leibe und ir gu^et ze rehtem Scherme fur alle ansprache als des Landes reht ist ze Osterriche. und wan der vorgedaht chouf und auch der Scherme mit unserm rat und mit unser gewizzen gewandelt und geschehen ist, des geben wir dem oft genanten Gotes hu^ese ze Chremsmunster zu^e einem Sihtigen urchu^ende und zu^e einer staeten vestenunge disen prief mit unser Stat Insigel vervestent. Ditz ist geschehen und diser prief gegeben, do von Christes Geburt ergangen waren Dreuzehen hundert Jar, und in dem Neunten Jar an Sanct Erhardes tage.

Source Fulltext: OÖUB 5 (Wien 1868) S. 614-615, Nr. XX (Anhang)