Ich Herman von freysing genant, Hofmeister des Goteshauses ze Neunburch vergich offenchlich und tu^en zewissen allen den, die diesen prief lesent oder ho^erent lesen, die nu lebent und her nach chu^enftich sint, daz Marcharts sun Ru^eger und sein chon frowe Agnes reht und redelich mit gesampter hant, do siz wol tu^en mohten, mit gunst und mit willen ir erben ir weingarten, des dreu vierteil sint und leit ze Weidnich an dem dorfe und heizzet der Scherig ze chauffen habent gegeben dem Ersamen manne Apte Fridereichen und der Samenunge des Gotes hauses zc Chremsmunster umb Dreu und fu^enfzch pfunt pfenning wienner mu^enz, habent auch dieselben herren den e genanten Ru^egern und sin Hausfrowen der selben pfenning reht und gaentzlich gewert, habent auch si sich des selben weingarten mit sampt ir erben reht fůrziht getan und habent in aufgegeben mit meiner hant, wan ich ze der zeit des weingarten rehter stifter und sto^erer was, han ich auch denselben weingarten den vor genanten herren, dem Apte und der Samenunge ze Chremsmunster verlihen ze rehtem Perchreht allen ir frum da mit ze schaffen, versetzen, verchauffen, ze geben, swem si wellen an allen irresal. Habent auch sich die vor genanten Marchart und sin sun Ru^eger und sin chon frowe Agnes dem e genanten Goteshause ze Chremsmunster fu^er den e geschriben weingarten gesatzt ze rehtem Scherme fu^er alle ansprache als des Landes reht ist ze Osterrich und swaz deu Samenunge ze Chremsmunster an dem Scherme schaden nement, den suln si haben auf Marcharts trewen und auf Ru^egers trewen sines suns und auf siner Hausfrowen trewen und unverscheidenlich auf alle deu, daz si habent. und daz der vor gedaht chauf und auch der Scherme fu^erbaz staete beleibe und unzerbrochen, des gib ich herman dem oft genanten Goteshause Chremsmunster zu^e einem Sichtigen urchu^ende und zu^e einer ewigen vestenunge disen prief versigelt mit meinem Insigel und mit des vorgenanten Marcharts Insigel. Darzu sint diser sache gezeug wisent ze der zeit stat Rihter, Dietrich Schyfer, Gebhart Ott, der Hu^eter, Friderich Hetzmann, Ott der humbel, Dietreich der Retzer, Seifrid Friderich Mensewer, Seifrid der Metzner, Leibel der Smid, Heinrich Nurnberger, Gerbot und sin pru^eder Perichtolt und Christan, Leutwin der Statschreiber und ander Ersamer Leute genu^ech. Ditz ist geschehen und diser prief gegeben, do von Christes Geburt gezalt und ergangeu waren Dreuzehen hundert Jar und in dem zweliften Jar an dem Heiligen Ebenweich tage.

Source Fulltext: OÖUB 5 (Wien 1868) S. 616-617, Nr. XXIII (Anhang)