Ich Katerina des Ratenvelser hausvro\aw vergich an disem brief und tu^en chunt allen den, di in sehent oder ho^erent lesen, daz ich mit gu^etem willen meiner chinder Friderichs und Elsbeten mein aigen auf dem Ek versucht und unversucht han zu ainem satz gegewen meinem bru^eder Matheo und seiner hausvro\awen ofmeien mit allem dem reht und ich schuld fur zwainzig phfunt phfenning alter wienner mu^enz mit so beschaidern red, ob mein Bruder Mathes und sein hausvrow ofmei verschiden an gerben, die si baid mit einander hieten, so sol daz vor genant guet ůf dem Ek her wider gevallen und erben auf mich und meiniu chinder mit allem dem reht, damit ich ims geantwurt han, der red sint Gezeug her Otaker von chirhperch, Otaker und sein bru^eder alber von fuert, leutold von Chirhperch und ander biderb leut. daz die Red stet beleib und unverchert, gib ich Katerina meinem bruder Matheo und seiner hausvrowen ofmeien disen brief zu ainem u^erchund versigelt mit mines wirdes des Ratenvelser und otaker des fuerter insigel. Der brief ist gegewen, do van Christes gebu^erd warn ergangen Tausent Jar, drewhundert Jar dar nach in dem dreitzehenten Jar an sant Georgen tage.

Source Fulltext: OÖUB 5 (Wien 1868) S. 619-620, Nr. XXVI (Anhang)