Reverendo in Christo patri et domino domino Friderico venerabili Abbati Ecclesie in Chremsmunster Totique Conventui ibidem Nicolaus dei gracia Abbas Ecclesie sancte Marie Scotorum in Wienna et totus Conventus dicti Loci cum oracionibus in Christo obsequiosam ad beneplacita voluntatem. Defectum labentis temporis et seculi transeuntis occasum ex instabili statu immo potius ex stabili lapsu conditionis humane licet omnibus intueri. Ecce enim miser homo vix dimidiat dies suos Qui iuxta testimonium sacre scripture velocius transeunt, quam a texente tela succiditur, Quod beatus Job in subito filiorum occasu diligenter intuitus humanas plenius miserias deplorabat. Homo inquiens natus de muliere brevi vivens tempore repletur multis miseriis Incertitudinem etiam et finem subitum considerans Ecce inquit in pulvere dormio et si mane me quesieris non subsistam. Beati igitur mortui, qui sic in domino moriuntur, ut post mortem tamquam iusti sint in bonorum memoria sempiterna, que quidem salubris et sancta non indigne dicitur, cum defuncti per eam a peccatis, que vivendo contraxerant, absolvantur Hoc vestra circumspecta provisio sollerter attendens et ut tantum bonum, quod sic in salutare solatium animabus pervenit defunctorum uberius augeatur et fructuosius dilatetur, feliciter elegistis inter nos vicissim specialis confraternitas affectionem mutuam et alternam, ut qui hactenus ||
eramus habitu et professione conformes, denuo mutue caritatis et alternate fraternitatis, quo ad salutem vivorum et defunctorum requiem exorandam quantum virtus nobis divina contribuit, simus perpetim votiva affectione consortes. Verum sicut gratum venit, quod post vota suscipitur, sic inconperabiliter gratius, quod preter spem offertur. Hinc est, quod nos singuli et singulariter universi de tanta benivolentia ad graciarum vobis assurgimus actiones bonum enim nobis est et valde jocundum vobiscum eiusdem fraternitatis esse participes qui, ut fama testatur verior in regulari vita disciplina monastica conversatione munda palam et passim operibus insistitis virtuosis unde viceversa presentis inter nos confraternitatis articulos nostris litteris approbamus et inviolabiliter a nobis volumus modo per vos nobis tradito perpetuis temporibus observari, videlicet ut singulis annis post Conversionem sancti Pauli proxima feria vacante in monasteriis omnibus Campanis tertio pulsatis cantentur vigilie mortuorum et altero mane missa publica in Conventu pro omnibus fratribus apud vos et nos inantea morituris Insuper quilibet Sacerdotum ipso die ad unam teneatur missam, quam dicat etiam ipso die vel altero, si forte habuerit aliam pro tempore assignatam Et inferiorum singuli Clericorum psalmos perlegant Quinquaginta, Sed qui litteras nesciunt cum La. ave maria dicant tociens pater noster et predictorum quilibet unam corporalem suscipiat disciplinam. Preterea, si quando unius vestrum nobis fuerit obitus nunciatus, prehabito communi officio defunctorum publice in Conventu ut premittitur tres missas dicat quilibet sacerdotum, inferiores Centrum La. psalmos, Illitterati cum Ave maria totidem pater noster. In vestro vero obitu domine Friderice pater reverende, nunc Abbas de speciali conniventia hoc addentes, ut pro requie anime vestre fiat quicquid pro unius nostrorum fratrum fieri est conswetum scilicet Quatuor misse privatim a Quolibet sacerdotum et XXXa. diebus continuis una missa cum prebenda cibi et potus, sicut unius ex fratribus adhuc vivi, que dabitur pauperi eo die. Verum ut huiusmodi confraternitatis vinculum inter nos perpetuis temporibus inconvulsum permaneat, et inviolabiliter observetur, presentem litteram Sigillorum nostrorum appensionibus roboramus. Datum anno domini M°CCC°XVII° in die beatorum Nerei Achillei et Pangracii martyrum.

Source Fulltext: OÖUB 5 (Wien 1868) S. 628-629, Nr. XXXVII (Anhang)