Wier Friedreich von Gotes genaden Abt ze Chremsmu^enster vergechen offenbar mit disem brief und tu^enn chunt allen den, di in lesent oder herent lesen, Daz der erberg man Stephan der Egenperger weilent hern Otachkers Sun von Egenberg, dem Got genad, fu^er vns chomen ist und hat uns auf gegeben den zechent, der hie mit namme geschrieben stet, daz ist, datz den Sibenmaiern auf vier guten und auf der mu^el, di dar zu geho^ert, und datz Aiterpach auf drin Ho^efen und auf ainer Mu^el, di da pei leit, der da stet Chunraten dem Noppenperger purger ze Wels zwelf pfunt alter wienner phenning von sant Jorgen tag, der schirst chumt uber ain Jar, den selben vorgenanten zechent Hab wier verliehen nach Pet dez vorgenanten Stephans dez Egenperger Danchwarten dem Tanpechen, purger ze Wels und seinen zwain Tochtern Katrein und Elspeten und irn Erben ze rechtem erbrecht mit allen den nu^etzen und da zu geho^ert, versucht und unversucht, also mit beschaidner red, daz si uns und unserm Gotzhaus alle Jar ierleich da von dienen schullen an unser vrawn tag zu der Dienstzeit ain pfunt newer wienner pfenning und nicht mer. Wier sein auch dez vorgenanten zechentz ir herren und gewern, also wir durch recht dez Gotzhaus aigen gewer schullen sein. Daz in di red stat und unverchert beleib, dar uber geben wier in ze urchunt disen brief mit unserm anhangundem InSigel. Daz ist geschehen nach Christes gepurd uber dreuzechen hundert Jar, dar nach in dem Viertzkistem Jar an sant Nyclos tag.

Source Fulltext: OÖUB 6 (Wien 1872) S. 361, Nr. 357