Wir Fridreich von gotes genaden abt ze Chremsmunster vnd der Conuentt dez selben Gotzhouss veriehen offenbar mit disem Brief Daz czu^e vns cho^emen Stephan der Egenperger hern O^etakchers sun von Egenperg, dem got genad, vnd her Wylhelm von Wynsperch Chorherre ze Pazzow^e, Her Charel von Luffenberch vnd Heinrich der Wu^ermtaler vnd ander ire Vreunt vnd habent mit vns gewarben vmb di Sechezehen pfunt pfenning czinses, die wir von alter her aller jaerichlich haben gehabt auf der Chirichen cze Vorichdorf. di selben pfenning habent si vns widerleget mit Czwelif pfunt pfenning Geltes auf rechtem Aygen ze dem ersten mit dem hof ze Parssenprunn Vnd mit der Swaig vnd mit der Mu^el in dem Gestental vo^er dem Walde vnd mit der Hueb cze dem Schoechlein Vnd mit der Mu^ele cze Egenstayn vnd mit aynem Lehen cze Mitterndorf im vnd seinem Vater hern O^etakchern von Egenberg, dem got genad, vnd allen seinen Vo^erdern cze aynem ewigen Sêlgeraet Also beschaydenlich, daz der Pfarrer ze Vorichdorf her ffridreich vnd alle sein nachcho^emen Pfarrer do selbs des Dritten Bru^ester ewichlich dester mer haben schol, wenne vo^er gewonhait ist gewesen, der alle tag taeglichen Messe schol haben in der Chappeln cze Vorichdorf, di ir stift ist, Vnd schol auch der Pfarrer do selbs, wer der sey, seinen Jartag vnd seines Vaters vnd aller seiner Vordern begeen aller iaerichlich fu^erbas ewichlich in den acht tagen nach dem Prehemtag auf aynen tag mit Vigilii vnd mit Saechs Messen an aller Erben schaden. Waer aber, daz der selbe Pfarrer cze Vorichdorf an ehaft no^et sevmikch woere an derselben Messe oder an dem Jartag als lang, daz sein di Erben oder di Pfarrleut nicht gedulden mo^echten, so schol er verualn sein der Chirchen cze Vorichdorf vnd den Pfarrleuten Saechczehen Pfunt pfenning Wyenner Mu^enzz vnd schullen auch die vorgenanten Pfarrleut di selben pfenning der Chirichen cze Pezzrung an legen Vnd schullen auch wier in da fu^er pfant antwu^ertten von im mit seinem gu^etlichen willen an alle widerraed, Taet wier dez nicht, so schol ez tu^en, wer vnsers Gotzhouss Vogt ist an vnserr stat. Vnd daz di wandlung vnd di sach als vo^er geschriben stêt, furbas ewichlich also staet vnd vnczebrochen beleib, Dar vber geben wier dem vorgenanten Stephan dem Egenperger vnd seinen Erben vnd den Pfarrleuten gemayn cze Vorichdorf disen Brif versigelten mit vnsers genêdigen Herren Byschof Go^etfrides von Pazzowe Insigel Vnd mit vnserm vnd vnsers Conuents Insigeln vnd mit hern ffridreichs Insigel cze den czeiten Pfarrer ze vorichdorf. Der Brif ist geben, do man czalt von Christes gepu^erd Dreuczehen Hundert Jar, dar nach in dem Czway vnd Virczgisten Jar an Sand Thomas tag.

Source Fulltext: OÖUB 6 (Wien 1872) S. 431f., Nr. 427