Ich Stefan der Egenberger vergich offenbar mit disem brief, daz ich nach meiner pesten vreunt rat ze der zeit, do ich ez wol getu^en mo^echt, dem erbern gaestlichen herren abt Fridreichen vnd seiner pru^ederschaft dez gotzhouss ze Chremsmunster geben han czwelif phunt phenning geltes rechtes aygen fur die saechtzehen pfunt pfenning zynses, di si heten auf der chirchen ze Vo^erichdorf aller iaerichlich in ze dienen ie ze der Chotemer vier pfunt phenning, also das di selben chirch ze Vo^erichdorf der saechtzehen pfunt zinses ewichlich schol ledig vnd vrey sein und han auch in fu^er di selben czwelif pfunt pfenning geltes geben di gueter, di hernach geschriben stent, mit allen iren nu^etzen ze stiften und ze sto^eren, an allev irrung ze nutzen, als andrev ire aygen. Den hof ze Parssenprunn und di swaig mit der müle in dem Gestental vo^er dem walde, di hueb ze dem Schoechlein und di müle ze Egenstayn und ayn lehen ze Mitterndorf und han auch ich vorgenanter Stephan der Egenperger daz getan meinen liben vater hern Otakchern von Egenperg, dem got genad und allen unsern vo^erdern ze einem ewigen selgeraet also beschaydenlich, daz der pfarrer von Vorichdorf her Fridreich und alle sein nach chomen pfarrer do selbs dez dritten briester ewichlich dester mer haben schol, wenne vo^er gewonhait ist gewesen, der alle tag taeglichen messe schol haben in der chappeln ze Vorichdorf, di unser stift ist, und schol auch der pfarrer do selbs, waer der sei, meinen jartag und meines liben vater, dem got genad und aller unser vo^erdern begen aller iaerichlich fu^erbas ewichlich in den acht tagen nach den Prehentag auf aynen tag mit vigilij und mit sechs messen an meinem und aller meiner erben schaden. Waer aber, daz der selbe pfarrer ze Vorichdorf an ehaft no^et seumich waere an der selben messe oder an dem jartag als lang, daz ich sein nach mein erben nach di pfarrleut nicht gedulden mochten, so schol er vervallen sein der chirchen ze Vorichdorf und den pfarrleuten saechtzehen pfunt Wienner pfenning und schullen auch sy di selben pfenning der chirichen zur pezzrung an legen und schol auch der vorgenant erber gaestlich herre abt ze Chremsmunster, wer der sey, mir oder meinen erben und den vorgenanten pfarrleuten da fu^er pfant antwu^erten von im mit seinem gu^etlichen willen an alle widerraed. Taet er dez nicht, so schol ez tun an seiner stat, wer dez gotzhouzz ze Chremsmunster vogt ist als der brif sagt, den wir von im und seinem convent dar uber haben. Und daz die red und di wandlung als vo^er geschriben stet, fu^erbas ewichlich also staet und unzebrochen beleib, dar uber gib ich in disen brif versigelten mit meinem insigel und mit hern Wilhalms von Wynsperch Chorherre ze Pazzow^e insigel und hern Charleins dez Roechen von Luffenberch und Heinrichs dez Wu^ermtaler insigeln, die ze den zeiten mein leib und mein guet in iren trewen und phleg heten. Der brif ist geben, do man zalt von Christes gepu^erde dreutzehen hundert jar dar nach in dem zway und virtzkisten jar an sand Thomans tag.

Source Fulltext: OÖUB 6 (Wien 1872) S. 432f., Nr. 428