Ich Ulreich der Aytterwekch und mein hausvrowe vrau Margaret vergehen offenbar mit disem prief, das wir das gu^eet daz pruesching mit allen den nu^etzen, di dar zu gehornt versuecht und unversuecht, daz des gotzhauz ze Chremsmu^enster rechtes vreysaezz gewesen ist, von dem selben gotzhaus erwarben und auch enpfangen haben nach rechten erbrecht nu^er zu unser paider leybgeding also, wenne wir paideu nimer sein, das das selbe guet das vorgenant gotzhaus ledigleichen wider ansterb mit allen rechten als vor an aller unser erben ansprach und ierrung. Wier schullen auch von dem eegenanten guet di weil wir leben und is inne haben, iaerleich an unser vrown tag ze der dienstzeit dem vorgenanten gotzhaus in der herren oblay dienen ein halb pfunt alter wienner pfenning und ein vogthuen hinz Puechchirchen, Waer aber das, das wier den selben dienst versaezzen und verzugen und in den nachsten acht tagen nach dem vorgenanten dienstag nicht ganz und gar verrichten, so schol das oftgenant gu^eet das vorgeschrieben gotzhaus an all unser und ouch unser erben ansprach ledichleichen an gevallen und seinen vrum damit schaffen als ee, und schullen wir ouch payder leibgeding und alles dez rechtes, das wir dar an haben, gaenzleich furvallen sein an allev wider red. Und das das alles staet beleib und unzebrochen, seind wier selben aygens insygels nicht haben, geben wier dem vorgeschriben gotzhaus ze Chremsmu^enster disen offen prief versygilten mit Hainreichs des Schikchen zden zeiten richter ze Wels anhangunden insygel und mit Dyetreichs des Amman purger ze Wels anhangunden insygel, di mit ir paider insygeln aller diser sach und wandlung recht gezeug sint. Der prief ist geben, da von Christes gepuerd ergangen warn dreuzehen hundert iar und dar nach in dem neun und vierzkisten iar an sand Bartholomeus tag.

Source Fulltext: OÖUB 7 (Wien 1876) S. 124, Nr. 126