Ich Alber der Lauterwech und all mein erben vergehen offenleich mit disem brief und tu^en chunt allen den, di in sehent horent oder lesent, daz wir von dem erbern herren hern Ernsten ze den zeiten abpt ze Chremsmu^enster und von dem selben seinem gotzhaus erwarfen haben ain gu^et ze erbrecht auf der Steten genant, daz wir auch gechauft haben von Dietreichen dem Ertzenperger und glegen ist in Weischiricher pharr, und schullen davon wir und unser erben oder wer daz gu^et nach uns inn hat, dem selben gotzhaus alle jar jaerleich dienen unverzogenleich an sand Michels tag zwainzk wienner phenning weinnart dienst und an sand Nyclas tag dreizk wienner phenning sand Nyclas dienst und zwai schaff habern ze vreiem dienst und an sand Andres tag sechs chaes und fumf reisten harbs und ain vogt hu^en und nicht mer, wer aber, daz dem gotzhaus an dem egenanten dienst vil oder wenchk uber di vorgenanten diensttag icht verzogen wu^erd vierzehen tag, so schol daz selb gotzhaus auf dem selben guet darumb pfenden an alle vrag mit unserm und di iz nach uns inn habent guetem willen, wer aber daz man iem pfand wert, so schol darnach u^eber naesten vierzehentag daz selb gu^et fu^er sezk wienner phenning ze wandel den selben gotzhaus vervallen sein und dar ab bechomen dienstes und wandels ganz und gar an allen seinen schaden, wer aber, daz darnach uber di nasten tzwi^er vierzehen tag daz egenant gotzhaus dienstes und wandels von dem selben gu^et von chainer irrung nicht ganz und gar bechomen mocht, so schol daz oft genant gu^et recht und redleich an allew ansprach und widerred dem oft genanten gotzhaus fu^er ain lediges und vreis gu^et vervallen sein. Daz daz also stet von uns und unverchert beleib, dar uber so geb wir ich egenanter Alber der Lauterwech ze einer offen u^erchund disen brief versigelten mit meinem anhangundem insigel, der geben ist nach Christes gebu^erd uber dreuzehenhundert jar und dar nach in dem fumfzigisten jar an aller heiligen tag.

Source Fulltext: OÖUB 7 (Wien 1876) S. 209f., Nr. 209