Ich Ha^ertneyd der Chrama^er puriger ze Wels und mein hausfrau^e vrau Ursula und all unser paider eriben wir vergehen offenleich an disem prief und tun chunt allen den, di in an sehent ho^erent oder lesent, daz wir von dem erwirdigen herreu hern Ernsten ze den zeiten apt ze Chremsmu^enster erwarfen haben daz gu^et, daz da haizzet an der Prukk und daz gelegen ist in Weischiricher pharr, do von wir und all unser eriben oder swer daz selb gůt nach u^ens besitzet alle iar ia^erleich von dienen schullen an u^enser frau^en tag ze der dienstzeit vier und sibentzig newr phenning wienner mu^enz und zwen und dreizzig jeuchartphenning und vier weinfahrtphenning und a^ein lampt ze anderthalben scho^et als izz ander des gotzhaus lau^et dienent und zwai recharn hu^enr und ain vogt hu^en. Wenn auch daz ist daz der herzog ein steur auf daz gotzhaus ze Chremsmu^enster layt, so schullen wir auch ein steur dulden mit ander des gotzhaus lau^eten und auch ander steur nicht, und schullen auch anders dienstz nicht geben, denn als vor geschriben stet. Wa^er aber, daz wir den vorgeschriben dienst und auch di vodrung ze yedem tag in dem iar nicht ga^eben als recht und pilleich wa^er und als gewonhait ist, so schol u^ens des gotzhaus amptman darumb phenden auf dem vorgenanten gůt mit unserm gu^etleichen willen an alles recht. Daz di red sta^et und unverchert fu^erbaz beleib, dar u^eber ze einem urchu^end gib ich vorgenanter Ha^ertneit der Chramer disen prief versigelten mit meinem anhangunden insigel. Der prief ist gegeben nach Christes gepurd uber dreuzehen hundert iar dar nach in dem vier und funfzigisten iar an unser frau^en tag ze der liechtmesse.

Source Fulltext: OÖUB 7 (Wien 1876) S. 350, Nr. 341