Ich Rueger der Lautterwekch und mein hausfrou^e und all unser erben wir veri^eehen mit disem offen brief, daz wir reht und redleich ze chauffen haben geben dem ersamen herren hern Go^erigen von Volkchenstorff und allen seinen erben unser guet, daz gelegen ist in Weischiricher pharr und daz genant ist auf der Stetten und daz unser rehtes erib ist gewesen von Chremsmunster, mit allen den rechten und nutzen es sei ze holz oder ze veld besuht oder unbesuht als wir es und unser vodern vor inn gehabt haben. Wir schullen auch des vorgenanten guets ir gewer sein fur all unser eriben als landes reht ist, naem er daruber dhainen schaden, denselben schullen wir in ganz ablegen und widercheren und schol auch daz haben datz unsern treun und darzu datz all unser hab wo di gelegen ist in dem land oder wi di genant ist, davon er des schadens becho^emmen schol mit unserm guetleichen willen. Und daz in die red also staet und unzebrochen beleib, daruber so gib ich in disen offen brief versigelten mit meim anhangundem insigel und ze ainer zeugnuzz mit Jacobs des Schueler purger ze Gmunden anhangunden insigel im an allen schaden. Der brief ist geben nach Christi gepurd dreutzehenhundert iar darnach in dem siben und funtzkisten iar an sand Gregorigen tag.

Source Fulltext: OÖUB 7 (Wien 1876) S. 494f., Nr. 487