Wir Albrecht von Gotes gnaden herczog ze Österreich ze Steyr ze Kernden vnd ze Krain graf ze Tyrol etc. bekennen vnd tun chunt offenlich mit diesem brief, daz wir angesehen haben die grozzen geltschuld, darinne daz gotzhaus ze Kremsmünster ist, vnd haben zu ergeczung derselben geltschuld vnd ouch durch daz es dester paz auz geltschuld chome, dem abt daselbs ze Kremsmunster vnd seinem conuent die gnad getan vnd tun ouch wizzentlich mit disem brief, daz das vorgenant ir gotzhaus ze Kremsmunster vnd all sein leut vnd holden, so darczu gehorend, von vns vnd den vnsern von dem tag, als der brief geben ist, vber siben gancze iar nacheinander vor aller stewr vnd anderer beswerung frey vnd ledig sein sullen, durch daz ir gotzhaus desterpaz wider komen vnd in ir leut dester furderlichen gehelffen mugen. Mit vrchund dicz briefs geben ze Wienn an sand Mathaeus abend des heiligen zwelif boten nach Krists geburd dreuczehen hundert iar, dar nach in dem zwain vnd achczigistem jare.

Source Fulltext: OÖUB 10 (Wien 1933) S. 128-129