Ich Weykchart der Pawr zu Otzstorff mein hausfraw vnd all vnser erben verichen vnd tun kund mit dem brif allen den, di in sechent oder horent lesen, als vns der edel vnd erwirdig geistleich her abt Mertt ze Kremsmünster durch vnser vleissigen pet willen gevrlaubt hat vnd (wir) mit sein gunst vnd willen daz gut ze Lautterbach von Chunrat dem Paindel gechauft haben, da dizeit derselb Paindel aufgessetzen ist gebesen, ist gelegen in Chirichdorffer pfarr, daz vrbar vnd pewtellehen ist von dem gotzhaus zu Kremsmünster, also in solicher beschaiden, das ich Weykchart der Pawr mein hausfraw all vnser erben oder f rewnt dem abbt vnd dem gotzhaus zu Kremsmünster vnd auch iren amptleuten vnd dienärn mit allen den dinsten rechten vnd vordrung von dem vorgenanten gut gehorsam vnd gewertig sein suln vnd wellen in aller der mazz vnd rechten, als mit alter her dauon gehört vnd als ander des egenanten gotzhaus eribgut recht ist an allen krieg vnd irrsal, vnd des verpinden vnd verluben wir vns mit vnsern trewn an aydes stat wissenlich mit dem brief dem vorgenanten goczhaus also halten volfuren vnd awszerichten trewlich an all arglist vngeuerlich. Vnd wann wir desselben guts lenger nicht haben wellen vnd mugen, daz suln wir leuten verchumbern vnd geben, di solichis eribguts genozz sind vnd den man von des gotzhaus wegen zu Kremsmünster gern leicht. Wer aber, ob dem vorgenanten herrn dem abbt vnd dem gotzhaus zu Kremsmünster von vns oder vnsern begen in iren gulten vnd rechten, als vor geschriben stet, icht abging vnd in damit nicht gehorsam wern, wie sich daz fuget, daz wissenlich wer, so ist daz vorgenant gut mit seiner zugehörung dem gotzhaus ze Kremsmünster ledichleich verfallen, vnd ob es dartzu daz gotzhaus indert schaden näm, des sein wir im phlichtig awszerichten vnd soln auch si daz haben ze vns vnd auf aller vnser hab. Vnd des zu vrchund gib ich Weykchart Pawr für mich mein hausfrawn all vnser erben vnd frewnt dem gotzhaus zu Chremsmünster den brif versigelten mit mein aigen anhangunden insigell; dartzu han ich vleissig gepeten di erbern Wolfgangen den Humbrechtzrieder dizeit richter zu Kremsmünster vnd mein swager Lienharten den Snytzinger, daz si der sach zeug sind mit iren anhangunden insigelln in vnd iren erben an schaden. Geben an Mitichen vor sand Gregorientag nach Kristi gepurd dreutzehen hundert jar darnach in dem sechsvndnewntzigisten iare.

Source Fulltext: OÖUB 11 (Wien 1983) S. 488-489