Ich Hanns Oberhaimer zu Pernaw bekenn fur mich und all mein erben und thun kund offenlich mit dem brief, als ich mit wolbedachtm muet und an stat meins brueder Warmund und aller unser miterben unser guet zu Walting an dem Ort in Gunskiricher pharr gelegen, Thoman Pirhinger zu Pirchech und allen seinen erbn gantz unser vordrung verkaufft, doch unns vorbehallten ichts anders, haben laut desselben kauffbriefs dan zwenunddreyssig phenning gelts dieselbn zwenunddreyssig phenning gelts wie die dan bestimbt sein auch im und seinen erbn verkaufft haben laut eins kaufbriefs von unns darumbn ausganngn, ich mein brueder und unser miterbn noch auf dem vorgemeltn guet laut des erstn kaufbriefs verwanndlung mit kauf oder wie sich das fugt auch umb zwenunddreyssig phen¬ning zu abfart und alsvil zu auffart vorbehalten, darzu unserer oberkait derselbn stukch aller und kainen artikchl vorangerurt, so dem vorgenantn Pirhinger seinen erben oder wer auf dem guet sitzt oder hinfur sitzn wirdet zu schadn kome, hat sich der egenant Pirhinger redlich und aufrichticlich mit mir und an stat meins vor genanten brueder und unsern miterbn vertragen und uns umb solh alles wie obn gemelt ist ain erber benuegen getan mit einer summ gelts, daran mich meinen bestimbten brueder unser miterbn und all unser erben yetz und hinfur zu ewigen zeiten wol benuegtn sol. Unnd darauf hab ich obgemelter Hanns Oberhaimer fur mich selbs und an meins egenantn brueder Warmund und unnser miterben stat, dafur ich mich gentzlichen angenomen hab, wissentlich mit dem brief das obgenant guet zu Waltling und all sein zugehorung frey ledig gesagt und sag und ertzell das auch in kraft dess briefs unser und aller unnser erben frey ledig aller sachen, wie und was wir darauf und an gehabt habn, dhainerlay vordrung noch gerechtikait darzu oberkait bevor noch hindan gesetzt, sunder der vorgenant Pirhinger oder sein erben oder wer den dasselb guet innhat, unns, unser miterbn und allen unsern und nachkomen yetz und ze allen zeiten nichtz nymermer phlichtig noch schuldig sein in kainen weg, dan solhs ir ledigs freys gut ist, damit sy ze thun, stifftn, storn und hanndln mugn nach irm guet gevalln mit verkauffn, versetzn, schaffn, machen und geben wie sew verlust on mein meins liebn brueder, unnser miterben und all unnser erben frewndt und nachkomen intrag widersprechen und meniclichs von unser aller wegen irrung, als dan solhs frey ledigs sagen und ertzellen recht ist angeverde. Zu urkund gib ich obgenanter Hanns Oberhaimer fur mich und an stat meins benanten brueder und unser miterben den brief besigelt mit meinem aign anhangundn insigl als der eltist und der benantn meins bruder und miterbn vormund. Der brief ist gebn an sant Anthoni des heiligen ainsidl nach Cristi geburde viertzehnhundert und im drewundachtzigistn jaren.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 3-5, Nr. 3006