Dem erwirdigen und geistlichen herrn herrn Johannsen, abbt zw Lampach unnserm gnadigen und lieben herren embieten wir ich Wolfganng am Eckh und ich Mert zw Kematen gesessen unnser undertanig und gehorsam dinst zuvor und fuegen ewr gnaden ze wissen, das ich genannter Wolfgang recht und redleich verkaufft hab vor ainer gueten zeit ainen viertail, so ich gehabt hab in dem guet am Eckh mit seiner zugehorung in Meckhenhofer pfarr gelegen, das dann ewr gnaden und ewr gnaden gotzhaws urbarigs und dinstparigs guet ist, den ich dann vormalen mit kauff in mein gewaltsam pracht hab von meinem prueder Gorgen. So hab ich genannter Mert an dem gemelten guet verkaufft meinen halbem tail, so ich angevarlich daran gehabt hab und haben, das alles zw kauffen geben unnserm lieben vettern Herman auffm Eckh, seiner hausfrau Margrethen und allen iren beden eriben. Wenn aber der bedacht unnser vetter Herman plodikait seines leibs halbm solhen kauff ververtigung bey ewrn gnaden als der gemelten herschafft Lampach nicht ersuechen hat mugen und nu mit todt verganngen ist, wie dem allem bitten wir ewr gnaden noch mit diemuetigem vleis als unnsern gnadigen herren, wellet des genannten unnsers vettern saligen hausfrawen und allen iren beden eriben solhen obgemelten unnseren vierden tail und halbem tail in dem bemelten guet mit seiner zugehorung gnadigklich geruehen ze bestatten und zw verleihen und in darum ain kauffbrieff nach gewanhait ewr gnaden gotzhaws vertigen und bestetten. So das beschehen ist, globen wir ewr gnaden hie mit in krafft des brieffs mit unnseren trewen an aides stat furpasser in ewr gnaden brieff, sigel und bestattung nichtz ze reden noch dawider ze thon in kainerlay weis trewlich und ungevarlich. Zw urkundt geben wir ewr gnaden den offen petbrieff, besigelten mit des edeln vesten Hannsen Reickherstorffer zw Wels aigen ze ruckh auffgedruckhten insigel, den wir genant Wolffgang und Mert mit vleis darum gepeten haben, doch im und sein eriben an schaden, dar unnder wir uns verpinden und fur unser erben alles stet ze halten lawt des brieffs. Zeugen der gepet umb insigel sein die wolgelerten namhafften und weisen maister Gorg Huebner etc. Jorg Aschll, burger ze Wels, Thoman Gastll und Gorg Rannckhel, der von Polhaim amptman. Datum pfintztag nach Juliane virginis anno domini etc. lxxxviiii.

Source Fulltext: StiAL, Kopialbücher, HS 21, P. Augustin Rabensteiner OSB: Documenta monasterii Lambacensis Bd. VI, ab anno 1483-1499, S. 255f, Nr. 3210