Quoniam gestis mortalium presertim vtilibus nouercari solet obliuio, necesse est facta digna memoria roborari scripturarum et testium munimentis. Nos igitur Livtoldus et Hainricus dicti de Chvnring significamus tenore presencium vniuersis, quod, cum Ecclesia de Chirhslag, cuius defensores sumus et legittimi aduocati, de qua a longe retroactis temporibus Parrochiali ecclesie de Pramberch de oblacionibus altaris duorum talentorum annuatim certa pensio soluebatur, per quasdam exactiones insolitas et deformes esset ad alciociorem (sic) et eiusdem ecclesie vicariis intollerabilem pensionem annis singulis alteratam et ex eo multa sequeretur indecencia, uidelicet mutaciones continue sacerdotum, plebis desolacio, inportuna materia scandalorum, nos eiusdem ecclesie comodis et saluti proprie consulere cupientes cum uenerabili patre Walthero preposito de Richersperig, ad quem huius mali correctio pertinebat, post aliquos inter nos licium anfractus conuenimus in hunc modum, quod idem prepositus nomine suo et conuentus sui assumpsit prenotatam ecclesiam chirhslag in perpetuos temporum successus debere conferri ex nunc de nostro consilio omnisque posteritatis nostre alicui persone ydonee possidendam iure pastoris legittimi et rectoris tali cum conditione interposita, quod idem sacerdos de nostro consilio, per ipsum prepositum successoresque suos constitutus duo talenta ab antiquo soluta preposito, conuentui uel ecclesie Prampergensi annis singulis soluere teneatur nec possit conpelli uel debeat ullo modo adampliorem de cetero pensionem cuiuscunque rei aut vtilitatis pretextu, nisi forsan ex mera liberalitate aliquid facere uoluerit spontanea uoluntate. Que si per predictos prepositum et Conuentum Richerspergensem rite non fuerint obseruata, cadent a jure suo ex presentis obligacionis debito et pacto nobis prestite sponsionis. Nos uero econtra propter futuras cauillaciones, que possent oriri, omni iuri, questioni, actioni, que nobis conpetebant contra predictos prepositum et Conuentum siue plebanos renunciamus ex nunc explicite et expresse. Volumus eciam et permittimus, ut defuncto ibidem sacerdote nullus officialium nostrorum de rebus suis siue mobilibus siue inmobilibus se intromittat, sed ad ecclesiam Richerspergensem pertineant uel quocumque ipse res suas testatus fuerit ob anime sue remedium et salutem. Nobis uero promisit antedictus prepositus cum conuentu, quod sacerdos, quem in Chirhslag constituerit, progenitorum nostrorum faciat memoriam in die sancti Georii martiris et anniuersarium sollempne ipsis debeat celebrare. Super omnibus itaque per nos premissis presentem litteram nostris sigillis in perpetuam rei geste memoriam fecimus conmuniri. Et predicti prepositus et Conuentus nobis e conuerso litteras sub presenti tenore dabunt super factis pactionibus sigillorum suorum munimine consignatas. Testes huius rei sunt frater Sighardus uenerabilis Abbas montis sancte Marie, frater Fridericus ibidem cellerarius, Dominus Otto plebanus in pramperch, dominus, Sifridus plebanus in edlitz, item dominus Sifridus de Richersperig, Perihtoldus de chrvmpah, Chvnradus de Sitzendorf, Hermannus de Sturmberch, Fridericus povschinch, hanricus Herlaher et alii quam plures. Datum in Chirhslag Anno domini M.CC.LXXXI. XI. kalendas Maij.

Source Fulltext: OÖUB 3 (Wien 1862) Nr. 573, S. 527-529