Wir Heinrich von Gotes genaden Pfallentz Graf ze Reyn vnd Hertzog in Bayern Veriehen offenbar an disem brief vnd tu°n chunt allen den, di disen brief sehent oder ho^erent lesen, wan vns der Ersam Probst vnd der Conuent ze Reychersperg mit gu^eten Hantfesten vnd briefen beweiset vnd geinnert habent, daz in unser lieber Vetter Hertzog Ott mit seiner Bru^eder Hertzog Ludwigs vnd Hertzog Stephans vnsers lieben Vaters, den got allen genad, willen vnd gunst, di genad hat getan, daz er in fu^er ettleichen schaden, den si vnd ir Gotshaus von in vnd von ir vodern heten genomen, ewichleichen erlaubt vnd gegeben hat ein pfunt weyts vnd vier pfunt chlaines Salzes ze fu^eren frey vnd lediges ze ainem mal in dem jar, als man es ze recht fu^eren sol, di selben genad haben wir angesehen vnd erchant vnd haben in durch Got und durch vnser selbers hayl vnd saeld vnd auch unserer nachchomen di selben freyung besta^et vnd auch von unsern besundern genaden gegeben mit disem brief also, daz si ia^erleich ein pfunt weytes vnd vier pfunt chlaines Saltzes ewichleichen fu^eren sullen an alle Mautt vnd zo^ell. Dauon wellen wir vnd gebieten vnsern Mauttnern ze Purchausen vnd ze Scha^erding, di ietzu° da sint oder fu°rbas da werdent, daz si in di genad gar vnd gaentzleichen sta^et haben vnd in di mit nichtev v^eberuarn noch bechrenchen, wan si vns gehaizzen habent, daz si vnsern Jartag dar vmb ewichleichen begen sullen vnd wellent, als vnsern vodern. Vnd dar v^eber ze einem vrchu^end geben wir in disen brief mit vnserm Insigel versigelten. Der ist geben ze Lantshut, da ma man zalt von Christes gepu^ertt Drevtzehen Hundert Jar darnach in dem Nevn und Dreizzigistem Jar an sanct Allexi tag.

Source Fulltext: OÖUB 6 (Wien 1972) Nr. 298, S. 302f.