Ich Herman vnd ich Fridreich vnd ich Paul Fridreichs sun des Zehentnaer in der Putenaw, dem got genad, vnd all vnser erben, veriehen offenbar an disem prief allen den, di in sehent oder ho^erent lesen, daz wir hintz dem zehent in der Putenaw, den vnser vater e malen ze leibgeding von dem gotzhaus ze Reichersperig hat gehapt nichtes nicht ze sprechen haben noch chaines rechtes darauf iehen nur als vil wier von genaden von dem probst oder wer dez gotzhaus ze Reichersperig pfleger ist, erwerifen mu^egen. Waer auer daz, daz wier daz indert v^eberfu^ern, daz schol der probst vnd daz vorgenant gotzhaws auf vnsern trewn vnd auf aller vnser hab haben, wo si gelegen sei. Vnd das das stet vnd vntzebrochen weleib, geb wir disen prief versigelt mit dez pidermans insigel Hainreichs des Chunigperiger vnd dez Waytzen, purger in der Newnstat insigel, darvnder wir vns verpinden alles daz stet wehalten daz vor verschriben ist, wan wir ainges insigels nicht enhaben. Der brief ist gegeben dreuczehen hundert iar darnach in dem newn vnd viertzigisten iar an sand Vrbanstag.

Source Fulltext: OÖUB 7 (Wien 1876) Nr. 110, S. 109f.