Ich Ludweich auf dem Stain, richter ze Passaw, vergich offenbar . . . daz vor mir veriechen habent fro Chvngvnt dez Hvsen witib saeligez vnd ir tochter Chungunt, daz si durch ir rechtev notdurft auf irem hauz gelegen an dem Nevnmarkcht in der lant strazz ze naechst dez Pamhaekchleins hauz habent ze chauffen geben Mertein dem Schoter seiner hausfraw vnd ir erben zwelf schilling pazzawer pfenning purchrechtz vmb sibenzehen pfunt auch pazzawer pfenning, der si gaentzleich gewert sint vnd di si auf ir e genant hauz verpawn habent also beschaidenleich, daz si in jaerleich da von raichen vnd dienen schullen ze dreyn taegen in dem iar ze weinachten, ze pfingsten vnd an sant Michels tag vnd an einem jegleichem dem selben tag ain holbez pfvnt pazzawer pfenning. - - - Vnd wann die obgenannt Chungunt der Hvsinn tochter di weill irr rechten iar nicht het, so habent fu^er sey Vlreich Remhart pekch gehaizzen vnd Peter der Glokel also in der maz, swann daz ist daz si zu iren rechten iarn chomt, daz si dann als daz staet haben sol — Ez haben auch recht di obgenant Hvsin vnd ir tochter — daz si daz purkrecht auch wol mogen wider chauffen in den naechsten fu^emf jarn di schirst nach ain ander choment auch vmb sybenzehen pfvnt pazzawer pfenning. — Mitt vrchvnde dez brifz den ich in dar vber gib mit meinen anhangvnten insigel, daz ich di weill von des gerichtz wegen han gehabt. Dez sind zeugen Fridreich vnd Christian di Gold, Hermann der Rauscher, Hans Vnfrid, Wernhart der Rotenpekch vnd ander erber lau^et. Der geben ist an sant Chvngvnten tag — dreuzehen hvndert jar vnd in dem vier vnd fu^emftzkistem iar.

Source Fulltext: OÖUB 7 (Wien 1876) Nr. 343, S. 352f.