Ich Wernhart der Saulberger mein hausfraw und all unser erben wir veriehen, daz wir haben ze chauffen geben unsern hoff datz Hybing und dy vyschwaid daselbs daz unser rechtz vrays aygen gewesen ist, dem erbern hern hern Lyenhartn von Morspach seiner hausfrawn und allen iren erben, und umb daz gelt darumb wir in den obenanten hoff alzo der oben beruert ist und dy vyschbaid geben haben, dez habent si uns ze rechten taegen und ze rechter zeit gantz und gar gericht und gewert an allen unsern schaden, und haben wir in auch den obenanten hoff und di vyschbaid geantwurt aus unser nutzz und gewer in ir nutzz und gewer fuer ir chaufftev und aygenleichew hab mit salmans hant und mit aller staet und darzue gehoert, und sein des chauffs und des hoffs und der vischbaid ir gewer und furstand wo in dez noet geschiecht alzo dez landes recht ist, und verzeihen uns auch dez obenanten hoffs und der vischbaid, alzo daz di iren fruem da mit schaffen und tuen nach allem irem glust und willen, und suellen wir noch unser erben noch nachomen noch niemt von unsern wegen nichtz darumb hintz in ze sprechen haben weder mit recht noch an recht noch mit chrieg noch mit gewalt noch mit dhainerlay zuespruechen noch irrung wie di gnant moechten gesein. Waer aher ob si dhain chrieg darumb an gyeng das waer von uns oder von unsern erben oder von wem daz waer daz den chauff antraeff an gevaer und dez si schaden naemen wie der gnant waer den ir ains pey sein treun gesprechen mag an ayd unberecht und ungesworn, den suellen wir in gantz und gar aus richten und widerchern an allen iren schaden, und sullen si daz haben auf uns und unsern treun und darzue auf aller unser hab wo wir di haben oder lazzen oder wo di glegen ist ausser lantz oder inner lantzz besuchter und unbesuchter, und sullen si allen ireu recht si sein geystleich oder wertleich darumb gen uns und aller unser hab an aller stat erlangt und behabt haben, und waz wir darueber mit in und iren helffern chriegen oder rechten wolten daz suellen si als behabt haben und wir verlorn, und wo wir darumb mit in chriegen oder melden daz sol als ab und toed sein, und sol uns wider si da niemt housen noch haimen noch dhainar freyung suell wir nindert geniezzen, und wer den brief mit irem willen inn hat oder fuer pringt oder wem si den hoff und di vischbaid gebent, der hat allen deu recht di oben geschriben sind als gaentzleich als si selber. Und daz in daz alzo staet und unzerbrochen beleib, geben wir in den offen brief mit meim Wernhart dez Saulberger anhangendem insigel, und ze einer pessern sicherait under dez erbern herren hern Goergen dez Ahaimer ze den zeiten pfleger ze Purchausen und under Hainreich des Eytzinger und Chunrat dez Lawer und Philipps dez Eytzinger anhangenden insigeln di der sach und dez chauffs taydinger gewesen sind. Daz geschach am samtztag vor dem aufferttag da man zalt von Christes gepu^erd dreutzehen hundert jar und darnach in dem segs und segtzgistem jar.

Source Fulltext: OÖUB 8 (Wien 1883) Nr. 281, S. 277f.